Minatorë dhe punëtorë të repartit mekanik në minierën e administriar nga Albchrome janë konfirmuar pozitiv për koronavirus.
Lajmin e ka bërë të ditur sindikata e minatorëve, sipas të cilës, punonjësit e infektuar kanë qenë në punë dhe siç dihet hapësirat e ambientit ku punojnë janë të përbashkëta dhe të mbyllura ç’ka e bën të lartë rrezikun e infektimi të punonjësve të tjerë.
Sakaq sindikata e minatorëve ka kërkuar që institucionet shëndetësore të marrë tamponët për të gjithë minatorët e minierave në Bulqizë.
“Ditëve të fundit ka patur një rritje shqetësuese të rasteve të qytetarëve të infektuar me virusin Covid-19 në gjithë vendin, gjithashtu edhe në qytetin e Bulqizës.
Mes qytetarëve të tjerë, kanë rezultuar pozitivë ndaj këtij virusi edhe disa punëtorë të repartit mekanik në minierën e administruar nga kompania Albchrome.
Ende nuk dihet saktësisht sesa punëtorë por, për shkak të punës në ambiente të përbashkëta dhe në hapësira të ngushta, numri i minatorëve të infektuar rrezikon të jetë i lartë.
Duke uruar shërim të shpejtë të kolegëve të infektuar, kërkojmë nga kompanitë minerare, në Bulqizë dhe gjithandej në vend, që të marrin masat e nevojshme për të mbrojtur shëndetin e minatorëve. Veçanërisht në rastin e kompanisë Albchrome, ku punëtorët rrezikojnë të infektohen gjatë transportit për në punë, në lëvizjen me ashensorët e ngushtë për në nivelet e minierës, në hapësirat e përbashkëta të punës, si edhe për shkak të mënyrës specifike të ajrimit.
U bëjmë apel institucioneve shtetërore përgjegjëse që të marrin masa të menjëhershme. Të bëhen testime masive të minatorëve dhe t’u garantohet paga në raste të karantinimit. Nëse situata rëndohet më tej, siç ka shumë rrezik që të ndodhë, duhet të mbyllen minierat e shndërruara në vatra infeksioni, por me të drejtë page për të gjithë minatorët.
Jeta dhe shëndeti janë përpara fitimit!”, thuhet në reagimin e sindikatës.
