Për shkak të pandemisë së coronavirusit, drejtuesit e Juventusit, kanë deklaruar se nuk do të shpenzojnë shuma të mëdha parash në merkaton e transferimeve.
“Zonja e Vjetër”, kështu ka gjetur një tjetër rrugë për arritjen e objektivave të saj. Metoda e aplikuar deri më tani është ajo e shkëmbimit “kokë më kokë” e futbollistëve. Pas finalizimit të marrëveshjes me Barcelonën për shkëmbimin mes Miralem Pjanic dhe Arthur Melo, bardhezinjtë duket se janë të gatshëm të bëjnë të njëjtën gjë me skuadrën e Chelseat.
Sipas asaj që raporton “Daily Express”, Juventus ka propozuar Aaron Ramsey si pjesë të marrëveshjes për të arritur te Jorginho. Italo-braziliani është objektivi numër “1” për mesfushën e Sarrit, me “Zonjën e Vjetër” të gatshme të humbasë uellsianin, në mënyrë që t’i jepte trajnerit të tij atë që kërkon.
E nëse Ramsey është drejt largimit, Rabiot duket se do të qëndrojë edhe një sezon pasi ka nisur të përshtatet me skemat e Sarrit dhe po bëhet edhe më dinamik: goli ndaj Milanit e konfirmon.
