Me humbjen 1-0 ndaj Barcelonës, Espanyol, siguroi matematikisht rënien në Segunda Division. Tashmë nga skuadra katalanase priten të largohen disa elementë cilësorë të cilët nuk mund ta konsiderojnë të ardhmen e tyre në ligat inferior të Spanjës.
I tillë është mesfushori, Marc Roca, një lojtar që ka fituar edhe Kampionatin Evropian U21 me Spanjën dhe që ka një klauzolë që kap vlerën e 40 milion eurove. Gjithsesi duke pasur parasysh performancën e dobët të klubit dhe pandeminë e coronavirusit kjo shifër është ulur ndjeshëm dhe ashtu siç raportojnë mediat në Spanjë, vlera është përgjysmuar në krahasim me klauzolën.
Kjo situatë ka bërë që 23-vjeçari të vihet nën shënjestrën e Milanit dhe Bayern Munich duke mos përjashtuar këtu edhe Real Madrid të cilët janë interesuar disa herë për organizatorin e talentuar.
Milani dëshiron t’i bëjë një dhuratë trajnerit të ardhshëm Ragnick me një talent që tashmë ka treguar cilësi të shkëlqyera dhe që mund të jetë rasti për projektin e gjermanit. Kampionët e Bundesligës nga ana tjetër, dëshirojnë që të vazhdojnë me projektin e tyre për të ndërtuar një skuadër të re në moshë për të vazhduar dominimin në Gjermani dhe për të konkurruar në Europë.
