Partia Socialiste duket se ka nisur përgatitjet për fushatën e zgjedhjeve të ardhshme parlamentare. Pa humbur kohë nga momenti që Kryeministri Edi Rama shpërndau porositë për deputetët, Elisa Spiropali, Gazmend Paja, Ervin Bushati dhe Pandeli Majko kanë nisur takimet me strukturat.
Ata kanë qenë të pranishëm në njësinë nr.13 ku kanë organizuar strukturat në këtë zonë.
Por ajo që tërheq vëmendjen është fakti se asnjë prej pjesëmarrësve nuk mban maskë, aq më tepër kur ndodhen në një zyrë ose ambient të mbyllur, dhe është e vështirë të thuash nëse Rilindasit dhe socialistët kanë respektuar edhe distancimin social.
Fotot janë publikuar nga ministrja Elisa Spiropali, dhe për nga mënyra duket se deputetë, këshilltarë apo drejtues të strukturave të PS, qoftë edhe formalisht nuk pyesin mbi këshillat e Komitetit Teknik anti-Covid-19.
Një ditë më parë, zv.ministrja Mira Rakacolli nuk diti si t´i përgjigjej pyetjes sepse ministra apo zyrtarë të Qeverisë nuk respektojnë këshillat për mbajtje maskash në ambiente të mbyllura apo distancim social.
E ndërsa të gjitha kritikat shkojnë në drejtim të qytetarëve, për të cilët thuhet se nuk respektojnë protokollin e sigurisë, në rastin e deputetëve, ministrave, të zgjedhurve vendorë masat nuk ekzistojnë.
