Legjenda e Tiranës, Agustin Kola, mbron klubin dhe presidentin Halili nga akuzat për trukim në sfidën e Kupës së Shqipërisë, përballë Bylis.
Në një intervistë të dhënë për “ABC News”, ish-mesfushori flet hapur për atë që mendon. “Mua më vjen keq për disa… Riti asnjëherë nuk shet ndeshje. E kam thënë dhe them. Më vjen keq për të dhe iu them të mos merret me ambientin jashtë, mos të merret me këta që flasin. Kështu e kanë sulmuar edhe në kohën tonë Tiranën, me gjëra të tjera. Tani e sulmojnë me këto. Për Tiranën i vë duart në zjarr. Tirana ka lënë ndeshje për miqësi, por jo për lek”.
Në fund për sa i përket fatit të këtij sezoni në Kategorinë Superiore, Kola, mendon se Tirana do të shpallet kampion. “Tiranën e shoh kampion, nuk është turp të të mundë Kukësi. Ata kanë një ekip perfekt. Shoh që njerëzit flasin për atë që ndodhi me Bylisin dhe thonë që “jo Tirana nuk merr kampionatin, jo Tirana kështu, jo Tirana ashtu”. Tirana ka një ekip në ngritje. Derbi është derbi. Kur kemi qenë ne mirë, na kanë mundur ata. Ka ndodhur edhe e kundërta”.
