Kryeministri Edi Rama do të takohet sot me drejtues të grupeve parlamentare të asaj që quhet si opozita e re lidhur me zgjedhoren.
Takimi pritet të zhvillohet në orën 19:00, ndërsa ai është kërkuar nga përfaqësues të opozitës së re. Kjo e fundit ka paralajmëruar se nuk do të mbështesë draftin konsensual të arritur nga Këshilli Politik mbi reformën zgjedhore, nëse nuk merren parasysh kërkesat e tyre mbi listat e hapura, prej nga kushtëzohet edhe mungesa e koalicioneve parazgjedhore, por edhe një rritje të pragut elektoral në 5 %.
Në takim, Partia Socialiste, do të përfaqësohet nga Edi Rama dhe Taulant Balla. Në seancën e fundit parlamentare, Rama tha se personalisht ishte kundër listave të hapura, por PS nuk ka votat në Kuvend për të miratuar draftin mbi reformën zgjedhore, ndërsa u shpreh se në rastin konkret partia që drejton është në krushqi qoftë me opozitën e drejtuar nga PD, ashtu edhe me atë që ndodhet në Parlament.
“Ata s´mund të na japin ultimatum, sikundër edhe ju s´mund të jepni ultimatum, pasi në të kundërt ne ikim nga Kuvendi dhe këtu s´ka më Kod të ri Zgjedhor”, tha Rama, duke lënë të hapur mundësinë se për gjetjen e konsensusit dhe votave për miratimin e Kodit të ri Zgjedhor, duhet që palët duhet të bëjnë lëshime, dhe të heqin dorë nga ideja se mund të përfitojnë gjithçka që kërkojnë.