Derbi i kryeqytetit mes Partizanit dhe Tiranës do të zhvillohet ditën e premte në orën 20:45. Një sfidë me mjaft rëndësi për të dyja skuadrat të cilat në këtë fundsezoni luftojnë për qëllime të ndryshme.
Bardheblutë synojnë fitoren, që të vendosin duart te titulli, ndërsa të kuqtë do të luftojnë për tre pikët që të kapin zonën europiane.
Pas humbjes së djeshme me Kukësin, skuadra e drejtuar nga Egbo nuk ndihet aq komode, sepse kryeson me 6 pikë në renditje, kur kanë mbetur edhe 4 ndeshje.
Me këtë hap fals, Tirana iu ka dhënë zemër verilindorëve, që kanë nisur të bëjnë haptazi tifo për “demat e kuq”. Thënë ndryshe, Partizani ka deri diku në dorë fatet e titullit, mund të vendosë se kujt do t’ia dorëzoje kurorën. Me siguri, nuk parapëlqen që kjo “stafetë” të përfshijë 24 herë kampionët, ndaj do të bëjnë çmos, atë që kanë në dorë, për ta ndryshuar kursin e trofeut të lakmuar
Ky derbi do të luhet në stadiumin ‘Arena Kombëtare”, një kërkesë kjo nga klubi i Partizanit të cilët janë organizatorët e këtij takimi.