Najada Çomo, shefe e Infektivit, e ka cilësuar si të frikshme dhe të pabesë infeksionin e koronavirusit.
Në një rrëfim në emisionin “Open”, Çomo tha se e kishte vendosur që do të ishte në ballë të luftës ndaj koronavirusit, por shtoi se ka pasur frikën ndaj familjarëve të saj.
“Më është dashur që në të gjitha rastet e humbjeve të jetëve të njoftoj familjarët e personave, ti them amanetet e fundit”, tha Çomo.
Sipas saj, situata që është brenda Infektivit është e papërshkrueshme.
“Stafi ka pasur frikë dhe kjo është normale, por ajo që dominon është profesioni, që e kalon frikën. Mërzitja jonë është kur kemi humbje jetësh”, tha ajo.
Shefja e Infektivit tha se Covid-19 është një realitet në Shqipëri, që mund të marrë jetë njerëzish dhe çdokush duhet të mbrohet.
“Mendoj se është perceptuar gabim hapja, pasi nuk po ruhen masat e sigurisë. Dhe pikërisht kjo mungesë masash dhe rregullash nga ana e qytetarëve, është shoqëruar me rritjen e shtrimeve në spitale dhe humbjen e jetëve”, tha Çomo.
