Lionel Messi mund të joshet nga një ribashkim me Pep Guardiola te Manchester City, deklaratë kjo që vjen nga Rivaldo, në mes të spekulimeve për të ardhmen e argjentinasit në Camp Nou.
Radioja spanjolle “Cadena SER” raportoi të enjten se Messi, nuk do të rinovojë kontratën aktuale me Barcelonën dhe do të largohet në vitin 2021.
Gjithsesi largimi i Messit nga Barcelona, momentalisht shikohet si e pamundur pavarësisht trazirave së fundmi në klubin katalunas. Nga ana tjetër nëse 33-vjeçari do të vendoste përfundimisht për tu larguar shumë klube do të viheshin në radhë për të.
Messi në të kaluarën ka qenë i lidhur për një kalim te Man City dhe ish sulmuesi i Barçës, Rivaldo, beson se ai mund të kalojë lehtësisht në Premier League.
“Nëse ai po mendon të largohet nga klubi, atëherë diçka nuk duhet të shkojë mirë në dhomën e zhveshjes te Barcelona dhe mbase ai është i lodhur me të gjitha problemet e vazhdueshme që kanë rrethuar klubin në muajt e fundit,” tha Rivaldo për “Betfair”.
“Do të ishte e trishtueshme ta shohësh atë të largohet nga Barcelona, por unë ende shpresoj se ai mund të qëndrojë të paktën për momentin.”
Një tjetër destinacion i përfolur për Messin është edhe Juventus, aty ku ëndrra e shumë fansave do të bëhej realitet, pasi Ronaldo dhe Messi do të ishin pjesë e një skuadre për herë të parë në karrierën e tyre të jashtëzakonshme.
“Me gjithë këto spekulime, unë besoj se disa agjentë tashmë po ëndërrojnë për një dyshe Messi-Ronaldo dhe kjo do të përflitej në të gjithë globin dhe do të ngelte në histori.” – tha Rivaldo.
“Nëse kjo do të ndodhte do të ishte e jashtëzakonshme, dhe unë besoj se Juventus do të rimerrte shpejt çdo investim të bërë për Argjentinasin falë përfitimeve që ata do të merrnin nga marketingu.”
