Ministrja e Shëndetësisë Ogerta Manastirliu u ka drejtuar një apel të gjithë të rinjve për të bërë më shumë kujdes ndaj Covid-19. Në një mesazh të lënë në rrjetet sociale, ajo thotë se aktualisht në spitalin infektiv mes të prekurve që po trajtohen, ka dhe të rinj me simptoma të rënda.
“Sot në spitalin infektiv mes qytetarëve të shtruar, ka të rinj që po trajtohen për simptoma të rënda të shkaktuara si pasojë e COVID19, sepse virusi nuk bën dallim moshe. Sot, ka shumë të rinj që me kontaktet e shpeshta me njëri-tjetrin, pa i respektuar rregullat, rrisin mundësinë e përhapjes së infeksionit dhe e përcjellin atë tek prindërit, gjyshërit, duke i vënë ata në rrezik serioz! Vetëm me kontributin e të rinjve, për të marrë përgjegjësi individuale në këtë kohë të pazakontë, përhapja e coronavirusit të rrezikshëm mund të frenohet. Vendose maskën. Ruaj distancën. Laj shpesh duart”, shkruan ministrja në një postim në FB, ku poston dhe një video, ku shfaqet këngëtarja Julka, e cila bën apel për respektim të rregullave me qëllim parandalimin e përhapjes së koronavirusit.
