Sot është çelur gara për një tjetër projekt të infrastrukturës rrugore.
Segmenti Milot-Fier, pjesë e Korridorit Adriatiko-Jonian, do t’i shtohet hartës së infrastrukturës rrugore të Shqipërisë.
115 kilometrat e këtij segmenti njoftohet se do të përshkruhen për 75 minuta, në një rrugë që sa u shpreh ministrja e Infrastrukturës dhe Energjisë, Belinda Balluku do të jetë me standarde të larta dhe do të lehtësojë jo vetëm qarkullimin e brendshëm, por edhe bashkëpunimin rajonal dhe europian të transportit.
Kryeministri Edi Rama u shpreh se rruga do të jetë me pagesë. Po ashtu, kreu i qeverisë u shpreh se do të jetë një aks që do të garantojë edhe qarkullimin pa pagese por me shpejtësi të ndryshme e kushte të ndryshme.
“Do të jetë një rrugë me pagesë, një aks që do të garantojë edhe qarkullimin pa pagese por me shpejtësi të ndryshme e kushte të ndryshme.
Aksesi i vizitorëve që vijnë nga Kosova do të jetë më i shpejtë dhe më i sigurt. Sot kemi Rrugën e Kombit, shërbim 24 orë shërbim për mirëmbajtje. Dhe, faktet flasin për një rritje të sigurisë. Në këtë aks ne do të zgjidhim problemin e madh të krijuar gjatë viteve të tranzicionit”, tha Rama.
Segmenti Milot-Fier përbën 37 për qind ose pjesën më të rëndësishme të korridorit Adriatiko-Jonian. Në pjesën e Shqipërisë duke nisur nga Miloti dhe duke përfunduar në by-passin e Fierit, por me synimin për ta shtuar këtë segment do të ndërtohen:
53 km gjurmë rrugë të reja dhe 62 km që do të jenë gjurmë ekzistuese, por të rehabilituara në kategorianë A dhe B.
E gjitha gjurma e ndërtuar si pjesë e segmentin Milot Fier, do të shoqërohet nga rrugë ndihmëse, dytësore pa pagesë.
“Kjo rrugë me pagesë ka dhe një analizë shumë të mirë financiare bazuar edhe në faktet ekonomike dhe pagën mesatare të Republikës së Shqipërisë. Është vendosur që pagesa mesatare të jetë 0.075 euro për kilometër për makinë, tha ministrja Balluku.
Balluku tha se 110 km në orë është shpejtësia maksimale dhe i gjithë korridori nga Miloti te Bypasi i Fieri për 1 orë e 15 minuta. Milot-Kashar brenda 2024, ndërsa Kashar-Lekaj 2026.
