Nga Boldnews.al
Kohët kanë ndryshuar, dikur Edi Rama shkruante kartolina për bllokmenët, udhëheqësit e saj, për “Barba Pilon” (dajën Spiro Koleka), dhe bëntë elozhe xhaxhit Enver. Sot, i biri i Enverit i shkruan Edit. Të dy kanë një gen, jo gjaku, por idealesh.
Vijnë nga elita e udhëheqjes, nga pjesa kupolë e sistemit komunist, duart e të cilëve janë larë me gjakun e mijëra të pafajshmëve; të varur në litar, me jetë të prerë në mes nga togat e pushkatimit dhe vite të rënda dënimi në burgjet politike.
Ilir Hoxha, nuk i shkruan Ramës si qytetar i lënë në mes të katër rrugëve, por i shpreh një lloj zhgënjimi duke ia thënë hapur se “je edhe i majtë”! Pra, na tradhëtove “biri ynë”… Por Rama do ndihet ngushtë sepse ky pinjoll i diktatorit u pezmatua se iu prish banesa ku qëndronte deri pak kohe më parë nëna e tij, Nexhmie Hoxha.
“Persekutimi i familjes së Enver Hoxhes u duk qartazi, se pasi na larguan me forcë nga banesa, IKMT, jo vetëm nuk e prishi pallatin por lejoi të hyjnë njerëz nga rruga që të plackitnin çfarë kishte mbetur në banesën tonë. Në këtë rast ne u demtuam jo vetëm materialisht por edhe moralisht se gjërat e shtëpisë tonë përfunduan në duart e njerzëve të panjohur, ndërkohë që mund të ishim lejuar ne ta boshatisnim banesën”, shkruan i biri i diktatorit.
Ai pretendon se po persekutohet, por nuk thotë se ishte e vetmja banesë që qëndronte në mes të rrugës kur të tjerat ishin shkatërruar prek kohësh. I ankohet Edi Ramës se iu dëmtuan materiale dhe sende që i përkisnin Enver Hoxhës, por nuk harron ta quajë të majtë dhe nuk do tia dijë se fadromat e Edi Ramës dhe Lali Erit kanë shtatë vite që vetëm prishin dhe mbulojnë me beton orendi e sende të qytetarëve, që në fakt është djersa e derdhur për shumë vite.
“Qëllimi i znj Dallëndyshe Bici ishte që me çdo kusht të nxirrte në mes të katër rrugëve familjen e Enver Hoxhës, dhe ia arriti qëllimit. Mbetëm pa shtëpi dhe ato orendi dhe objekte që shpëtuam i shpërndamë në miq e shoqëri. Më vjen keq zoti Kryeministër që t’ju them, se u përsërit e njëjta situatë siç na nxorri nga shtëpia Sali Berisha në vitin 1993. Më vjen çudi si përputhen këto akte fashiste edhe pas 30 vjetëve, për më shumë nga një qeveri e majtë”?!!!-shkrun mes të tjerash Ilir Hoxha.
I biri i Enverit ndjehet i “persekutuar”, ka frymë dhe forcë të përmendë fjalën persekutim. Ka fuqi ti drejtohet kryeministrit e për dijeni edhe ambasadorëve të huaj, që përfaqësojnë shtete që familja e tij dhe kupola e diktaturës i konsideronte armiq të vendit.
Ilir Hoxha ankohet dhe ka një motiv, atë e gjen tek kryeministri Edi Rama që dukshëm e konsideron si të “tijin”, ndaj edhe shpreh zhgënjim. Megjithatë familja Hoxha nuk u nxorr me dhunë në mes të rrugës, përkundrazi, për turpin e pushtetit Rilindas, vetëm pallati i Hoxhës qëndronte në këmbë, kur qindra banesa të tjera që prekeshin nga zgjerimi i Unazës së Re ishin kthyer në pirgje inertesh.
Hoxha dhe Rama, të dy këta protagonistë dhe pinjollë të denjë të një sistemi diktatorial, e dinë mirë që nuk ka persekutim ndaj familjes së “xhaxhit Enver”. Persekutim dhe krim i rëndë është ajo që u bë me familjet që u prekën nga zgjerimi i bulevardit të rid he të Unazës së Re, një vit më parë. Në orën katër të mengjësit policia i mbyti me gaz lotsjellës duke ua hedhur brenda banesave. Të moshuar, fëmijë të mitur, madje edhe gra shtatzëna dolën duke gulçuar dhe u morën zvarrë. Fadromat e Lali Erit i rrafshuan ato shtëpi, ndërsa banorët e pambrojtur nuk kishin forcë as të ankoheshin!
Këto krime dhe persekutime që ndodhin në të ashtëquajturën demokraci, por nën drejtimin e Rilindjes së Edi Ramës, i dinë mjaft mirë të dy të “pezmaturit”, dhe duket qartë se Hoxha është i zhgënjyer dhe gjithnjë zhgënjimi vjen për atë që e do dhe e vlerëson! Djali i tyre Edi po vihet në siklet. Në tavolinën e punës të parën letër që do të hapë pasi të kthehet nga Kosova është ajo e të birit të “Xhaxhit Enver”. Malinjiteti të vret, por kaq pështirë vetëm një pushtet si Rilindja mund ta shfaqë!
