Luis Suarez është rikthyer nga dëmtimi në gju që pësoi disa muaj më parë në formën më të mirë, duke shënuar në dy ndeshje radhazi. Në ndeshjen ndaj Celta Vigos ai shënoi dy herë, megjithatë, Barcelona nuk ka arritur të sigurojë fitoren duke barazuar 2-2.
E vështirë për katalanasit të pranojnë një pikë të vetme veçanërisht duke ditur se Real Madrid, mbrëmjen e sotme, do të mund të shkëputet në +2.
“Jam i lumtur në nivel individual që kam ndihmuar skuadrën me dy gola. Por në përgjithësi jam akoma shumë i zemëruar dhe i zhgënjyer”, ka thënë Pistolero pas ndeshjes për mediat spanjolle.
“Kemi humbur dy pikë dhe ka shumë gjëra mbi të cilat duhet të punojmë për t’u përmirësuar. Po shpërdorojmë shumë pikë. Nuk na ka ndodhur kurrë më parë. Jemi të zhgënjyer. Kemi humbur dy pikë të tjera në luftën për titull”.
Në lidhje me duelin me Real Madrid:
“La Liga? Tashmë nuk varet më nga ne. Fati ynë ishte në dorën tonë, tani nuk është më kështu. Reali komandon dhe duhet të presim që të gabojnë”.
