Shefja e hetimit epidemiologjik në Institutin e Shëndetit Publik, Eugena Tomini, duke folur për situatën e shkaktuar nga koronavirusi në vend, shprehet se virusi ka një transmetim të dendur aktualisht, ndërsa iu bëri thirrje qytetarëve që mos t’i neglizhojnë shenjat klinike dhe të respektojnë masat.
“9 ditë rresht kemi pasur vdekje. Transmetimi i virusit është evident dhe ka një lloj agresivitet përkundër të gjithë rasteve që janë me sëmundje bashkëshoqëruese. Detektimi në kohë i virusit, apo prezenca e tij dhe mosneglizhenca qoftë edhe nga ana e popullatës është shumë për t’u vlerësuar. Mos të neglizhohen shenjat klinike, kryesisht tek grupet e riskut.
Është një situate që është nën kontroll sa i përket anës epidemiologjike. Nuk ishte kaq e parashikuar që virusi do ta sillte situatën epidemike me një simptomatologji ndryshe nga javët e para të epidemisë, sepse kemi më shumë raste, edhe pse një pjesë e tyre po izolohen në shtëpi.
Pjesa tjetër që kanë kërkuar hospitalizim, janë me një progresiv të gjendjes klinike të menjëhershme dhe që kërkojnë trajtim spitalor. Por, situata epidemiologjike është nën kontroll”, tha Tomini për Vizion+.
Sa i përket rritjes së testimeve duke u bazuar në shifrat e fundit, Tomini pohoi se numri i testeve varet totalisht nga gjurmimi aktiv që bëhen nga njësitë vendore të kujdesit shëndetësor në të gjitha rrethet e vendit.
“QSUT nuk është një klinikë që ka fluks të ngadalësuar. U privua gjatë fazave të para të pandemisë për të mos pasur fluks. Me fazën e hapjes, aty janë mbi 50 shërbime dhe sigurisht që përgjegjësia e mjekëve është për t’u vlerësuar, pavarësisht hasjes së rasteve pozitive dhe në personelin shëndetësor.
Jemi në një shkallë më të lartë të testimeve. Varet totalisht nga gjurmimi aktiv që bëhen nga njësitë vendore të kujdesit shëndetësor në të gjithë rrethet e vendit. Gjurmimi aktiv i rasteve është shumë herë më i madh. Numri i testimeve po shkon në mënyrë graduale duke u rritur. Masat duhet të respektohen sepse virusi ka një transmetim të dendur aktualisht”, sqaroi ajo.
