Katër persona janë arrestuar nga policia e Tropojës në kuadër të operacionit “Porosia”, pasi janë kapur në flagrancë në momentin e këmbimit të një sasie lënde narkotike.
Pas hekurave kanë përfunduar shtetasit: B. B., 45 vjeç, banues në Shoshan, Tropojë; E. H., 32 vjeç, banues në Bajram Curri, Tropojë; P. M., 52 vjeç, banues në Shoshan, Tropojë; F. M., 19 vjeç, banues në Shoshan, Tropojë;
“Arrestimi i tyre u bë pasi nga tërësia e veprimeve hetimore u bë i mundur dokumentimi i veprimtarisë kriminale të kryer nga këta shtetas në drejtim të tentativës për kultivim dhe shitje të kanabisit. Këta shtetas u kapën në flagrancë nga Policia në momentin e këmbimit të 518 gr. lëndë narkotike. Nga veprimet hetimore këta shtetas dyshohen si autorë të kultivimit të bimëve narkotike në fshatin Shoshan.” thuhet në njoftimin e policisë.
Materialet i kaluan Prokurorisë pranë Gjykatës së Shkallës së Parë Tropojë, për veprat penale “Kultivimi i bimëve narkotike” dhe “Prodhimi dhe shitja e narkotikëve”, të kryera në bashkëpunim.
