Zyrtarët e lartë të shëndetësisë u thanë të martën ligjvënësve amerikanë se përgjigja e vendit ndaj koronavirusit po përmirësohet – megjithëse 26 shtete amerikane tani raportojnë një rritje të numrit të rasteve të COVID-19.
Këto shifra janë vendosur gjithnjë e më shumë në qendër të një debati politik pasi Presidenti Donald Trump tha në një tubim të shtunën se ai kishte kërkuar testime më të ngadalta për koronavirusin. Korrespondentja e Kongresit të Zërit të Amerikës, Katherine Gypson ka më shumë nga Capitol Hill.
Vatra të reja të virusit janë shfaqur në Kaliforni, Arizona dhe Teksas, ndërsa në zona të tjera të Amerikës po rihapen bizneset.
Presidenti tha se e kishte seriozisht kur u tha mbështetësve se ai po ngadalësonte testimin ngaqë zbulohen më shumë raste të virusit.
Presidenti Donald Trump flet me gazetarët (23 qershor 2020)
“Nuk bëj shaka. Më lejoni vetëm t’jua them, më lini ta sqaroj. Ne kemi programin më të madh të testimit kudo në botë. Ne testojmë më mirë se kushdo në botë. Testet tona janë më të mirat në botë, dhe ne kemi shumicën e tyre. Duke bërë më shumë teste, ne gjejmë më shumë raste“, tha Presidenti Trump.
Shtëpia e Bardhë më vonë i tërhoqi mbrapsht komentet dhe eksperti i grupit të punës për koronavirusin, Dr. Anthony Fauci u tha ligjvënësve që nuk ishte kështu.
“Në dijeninë time, askujt prej nesh nuk i është thënë ndonjëherë që të ngadalësojë testimin. Ky është thjesht një fakt. Në fakt, ne do të bëjmë më shumë testime“, tha Dr. Fauci.
Kjo u mbështet nga zyrtarë të tjerë të lartë amerikanë, por demokratët ende kanë shqetësime të mëdha për përgjigjen e administratës.
Frank Pallone
“Ende jemi larg nga 900’000 testet ditore që ekspertët e shëndetit publik besojnë se kemi nevojë. Gjithashtu jemi penguar nga refuzimi i administratës për të zhvilluar dhe zbatuar një strategji kombëtare të testimit dhe gjurmimit të kontakteve“, tha Ligjvënësi demokrat, Frank Pallone.
Kjo strategji do të mbushë boshllëkun derisa të mund të zhvillohet një vaksinë. Me testet e para klinike për vaksinat që fillojnë muajin tjetër, Dr. Fauci thotë se ai ka optimizëm të kujdesshëm.
“Kjo do të na vinte në fund të këtij viti kalendarik dhe në fillim të vitit 2021“, tha Dr. Fauci.
Ligjvënësit amerikanë gjithashtu po shqyrtojnë mënyra për të ndëshkuar Kinën për reagimin e saj ndaj virusit – pavarësisht një ligji amerikan që ndalon paditë në gjykatat amerikane për vende të huaja.
Lindsey Graham
“Pse do të ndërmarrim këtë hap të paprecedent? Kjo është pandemia e tretë që del nga Kina. Ne gjithashtu e dimë që Kina nuk arriti të informojë botën për natyrën e virusit. Se ata kufizuan udhëtimin në Kinë, por lejuan qytetarët kinezë të udhëtojnë nëpër botë. Ata e dinin se transmetohej nga njeriu tek njeriu dhe ata nuk informuan siç duhet OBSH-në, sipas mendimit tim, dhe botën në përgjithësi“, tha Senatori republikan, Lindsey Graham.
Shtetet e Bashkuara janë të parat në botë për rastet e infeksionit me koronavirusin – me më shumë se 2.3 milion raste deri më sot – dhe më shumë se 120,000 vdekje./VOA/
