Transporti është një ndër sektorët më të goditur nga kriza e Covid-19. Situata e vështirë, në të cilën ndodhen operatorët dhe kërkesat e tyre ekonomike kanë mbajtur peng nisjen e këtij shërbimi, aq shumë të mirëpritur nga qytetarët.
Teksa Ministria e Infrastrukturës ka njoftuar se shërbimi i transportit publik duhet të niste këtë të mërkurë, kjo nuk ka ndodhur, me përjashtim të disa linjave në transportit ndërqytetës.
Për të diskutuar për këtë çështje tejet delikate ishin të ftuar në A2 Business Week Rixhin Qosja, kryetar i Shoqatës së Transportit Urban dhe Ervin Shijaku, përfaqësues i Shoqatës Kombëtare të Transportit Qytetas.
Qosja u shpreh se situata është shumë dramatike për këtë sektor. “Kemi që prej datës 11 mars të mbyllur, në kolaps ekonomik. Humbjet llogariten rreth 3 milionë në muaj. Në disa qytete kanë nisur linjat interurbane, të cilat ose nuk e kanë lexuar protokollin e sigurisë ose nuk e kanë kuptuar. Ky protokoll e bën të pamundur financiarisht si edhe ligjërisht për të filluar operimin”, u shpreh Rixhin Qosja.
I të njëjtit mendim ishte edhe Ervin Shijaku, përfaqësues i Shoqatës Kombëtare të Transportit Qytetas. “Është e pamundur të ofrohet shërbimi me atë protokoll që ka dalë. Kostot nuk përballohen. Sipas protokollit, në autobus duhet të kesh vetëm 50% të kapacitetit sepse personat duhet të ulen diagonalisht. Kjo bën që kosto të rritet me 50%. Në bazë të protokollit, çdo operator duhet të dezinfektojë autobusin pas çdo rruge. Por kostoja 55 mijë lekë është e pamundur”.
Qosja flet për kërkesat e tyre. “Ne kemi bërë një kërkesë me 4 pika shumë të qarta. E para është heqja e akcizës së naftës. E dyta, zerimi i TVSH-së për këtë vit që jemi dhe rikthimi i saj në nivelin 6 përqind. E treta, rimbursimi i kapacitetit të munguar. Ne kërkojmë nga qeveria respektimin e një ligji të cilin ajo e ka miratuar vetë, por si e tillë nuk ka nxjerrë aktet nënligjore. Është rimbursimi i kategorive që e rifitojnë transportin falas”.
kryetar i Shoqatës së Transportit Urban shprehet i vendosur se nëse kërkesat nuk plotësohen nuk rinis puna. “Në rast se këto kërkesa nuk do të plotësohen, atëherë ne jemi të paaftë financiarisht për të filluar punën”, u shpreh në A2 Business Week Rixhin Qosja.
