Komisioni i Ekonomisë ka miratuar këtë të martë propozimin e Presidentit Ilir Meta, për Dr. Arben Shehun në krye të KLSH. Antarët e komisionit, kanë miratuar kandidaturën me 15 vota pro, 1 abstenim dhe dy kundra.
Më herët, Presidenti Ilir Meta i ka dorëzuar Kuvendit propozimin për kreun e KLSH-së. Kreu i shtetit i propozoi Kuvendit që Dr. Arben Shehu të zgjidhet në pozicionin e Kryetarit të Kontrollit të Lartë të Shtetit.
Në një letër drejtuar Kuvendit, Meta i ka kërkuar ligjvënësve që ta shqyrtojë këtë kandidaturë me objektivitet dhe përgjegjshmëri.
Meta shprehet se Dr. Arben Shehu është kandidat shumë i përshtatshëm, me përvojë, profesionalizëm dhe me dinjitet.
“Dr. Arben Shehu është diplomuar jurist dhe është një ndër njohësit më të mirë të së drejtës penale. Dr. Shehu është gjithashtu i diplomuar edhe në fushën e administrimit të biznesit, me një përvojë të gjatë akademike, kërkime dhe shkrime shkencore. Kuvendi i Shqipërisë do ta shqyrtojë këtë kandidaturë brenda këtij sesioni parlamentar, me objektivitet dhe me përgjegjshmëri”, shkruan ndër të tjera në letër kreu i shtetit.
