Kapiteni i Tiranës, Erando Karabeci, luajti titullar pasditen e djeshme në fitoren 3-0 kundër Vllaznisë.
31-vjeçari duke folur pas ndeshjes për Supersport pranoi se si çdo futbollist tjetër preferon të luajë, por është gati të sakrifikojë nëse skuadra është e suksesshme.
“Çdo futbollist, ka dëshirë të jetë në fushën e lojës dhe të japë më të mirën e tij. Duhet të ndihet pjesë e ekipit, të japë kontribut. Unë si kapiten dhe si Karabeci, kam shumë vite këtu, pothuajse 11 vite dhe normalisht, ecuria e ekipit është pjesa më e rëndësishme dhe që më intereson. Nëse ne shkojmë të titulli, të gjithë do të jemi të lumtur.
Që të fitosh, duhet të jesh grup. Suksesin nuk e arrin një lojtar ose dy. Që të arrish sukses, duhet të jeni të bashkuar dhe të japësh maksimumin në çdo ndeshje. Jo vetëm ata që luajnë, por dhe ata që nuk luajnë, duhet të jenë në harmoni të plotë.
Jemi drejt rrugës së duhur, por ka dhe shumë ndeshje përpara. Duhet të vazhdojmë me këtë ritëm dhe të shohim punën tonë. Nuk duhet t’i shohim kundërshtarët, pasi nëse fitojmë ndeshjet tona, do t’ia dalim. E meritojmë këtë titull, pasi kemi dhënë maksimumin për shumë ndeshje.
Askush nuk është i lumtur kur është në stol. Është viti i duhur që ne të arrijmë të marrim atë titull që na ka munguar prej shumë vitesh. Ne jemi lojtarë me eksperiencë dhe kur gjërat ecin mirë, nuk kemi pse të shkaktojmë probleme. Nëse ka probleme mes lojtarëve, gjërat nuk ecin vaj. Ne jemi futbollistë që luajmë prej shumë vitesh dhe primare për ne, është ecuria e ekipit. Kjo ndoshta është dhe një “sakrificë” që ne e pranojmë, në mënyrë që ekipi të jetë i suksesshëm”, tha Karabeci.
