Nuk është e vërtetë që Pekini është vënë në karantinë prej rasteve të reja apo prej frikës së një vale të dytë të infeksionit COVID-19.
Në një intervistë për gazetaren Esmeralda Mulaj në Euronews Albania, gazetari Edison Myrtezai, nga Kina, përgënjeshtroi lajmet e përhapura në rrjet sipas së cilave frika ka mbërthyer kryeqytetin kinez prej rreth 29 milionë banorësh. Megjithatë ai tha se përballë rezikut të mundshëm, autoritetet kanë marrë masa.
“Situata nuk është aq e rëndë sa thuhet, sepse janë 28 zona banimi së bashku me 11 distrikte dhe ato janë sporadike. Nuk është i gjithë qyteti në karantinë, që për nga popullsia është ndër më të mëdhenjtë,” – u shpreh Myrtezai duke theksuar se autoritetet janë vendosur në gatishmëri.
Sipas gazetarit shqiptar ekspertët e shëndetësisë kineze janë të mendimit se ndryshe nga Wuhani, provinca nga ku buroi infeksioni në muajin dhjetor, Pekini “nuk mund të kthehet kurrë në një Wuhan të dytë”.
“Rastet këtu janë diagnostikuar që në momentet e para dhe nuk pati një shpërhapje me qindra apo mijëra të infektuar. Për më tepër rastet janë në pjesën jugore të Pekinit, në distriktin Fengtai ku është dhe tregu Xinfadi, atje ku dhe plasën numrat më të fundit,” – tha Myrtezai teksa theksoi se aktualisht janë hapur 36 mijë qendra tamponimi dhe mendohet se nuk është e nevojshme që i gjithë qyteti të futet në procesin e analizimit.
Gazetari shqiptar tregoi se për lëvizjet autoritetet kanë rreptësuar kontrollet, pasi provincat dhe qytetet e afërta janë të frikësuara. Kjo kërkon që çdo udhëtar t’u tregojë autoriteteve rezultatet e tamponimit të kryera brenda një jave.
“Matet temperatura, kërkohen rezultatet e analizave dhe gjithashtu lexohet barkodi i të dhënave të shëndetit, gjëra të cilat janë vendosur në radhë dhe nuk ka asnjë problem. Krahasuar me numrin e popullsisë, rastet janë normale nuk janë në raport të madh krahasuar me Shqipërinë apo vende të tjera të Evropës,” – tha më tej gazetari.
I pyetur për sa i përket të shtruarve nëpër spitale apo për ashpërsinë që po tregon virusi, gazetari Myrteza u shpreh se “pjesën më të fortë të sulmit virusi e ka treguar në stinën e ftohtë” ndërsa aktualisht gjithçka është më e qetë dhe autoritetet janë në gatishmëri.
“Specialistët kanë treguar se muajt e verës do jetë dhe periudha disi më e qetë, pasi dimri kishte pikun. Në 24 orët e fundit janë diagnostikuar 25 persona me virus, teksa 3 prej tyre kanë qenë nga jashtë Pekinit, nga Hebei dhe Tianjin. Autoritetet kanë mbledhur të dhëna të volitshme për virusin muajt e kaluar dhe duket se nuk ka alarm. Spitalet janë gati, specialistët janë gati dhe njerëzit dinë si të mbrohen,” – u shpreh gazetari Myrteza, i cili tregoi se ka pasur raste ku qytetarë nuk kanë dashur ta kryejnë tamponin dhe janë vetëizoluar nga frika për të mos vajtur në spital.
Megjithatë gazetari shqiptar tregoi se qyteti ka ndryshuar, njerëzit nuk shfaqen si më parë dhe qyteti nuk është me të njëjtin aktivitet social. Pandemia ka nxitur një frikë sidomos për konsumin e peshkut, i cili po konsiderohet si burim i infeksionit, stereotip prej të cilit po vuajnë restorantet.
Maskat nuk janë me detyrim, por ato kërkohen medoemos në transportin urban.
Virusi i COVID-19 zyrtarisht u njoh nga Organizata Botërore e Shëndetësisë në fund të muajit dhjetor, pasi autoritetet kineze e kishin pikasur në rajonin e Wuhanit.
Prej dhjetorit Kina ka njohur zyrtarisht rreth 84,500 persona me COVID-19, nga të cilët rreth 70 mijë janë shëruar dhe rreth 4,700 kanë vdekur. Pas epidemisë së tre muajve të parë të vitit, autoritetet deklaruan një zbehje të rasteve dhe kontroll të situatës.
Mirëpo dy javët e fundit raste sporadike janë rikthyer në Pekin.
COVID-19 u shpërhap vrullshëm pas muajit shkurt në gjithë botën. Aktualisht pas 7 muajsh kur u pikas rasti i parë, numërohen rreth 8.5 milionë njerëz të infektuar, prej të cilëve 450 mijë kanë vdekur.
Shtetet e Bashkuara të Amerikës me mbi 2 milionë të infektuar, janë vendi më i prekur në botë.
