Regjisori Edmond Budina ka reaguar lidhur me lajmin e bërë publik në disa media dhe të konfirmuar nga kryeministri Edi Rama se është infektuar me koronavirus.
Budina thotë se nuk ka asnjë shenjë të koronavirusit, por shton se është dyshues për shkak të këmbënguljes nga ana e ISHP për të bërë testin edhe pse nuk kisha shenja të dukshme, ndërkohë që atyre që kanë temperaturë i është refuzuar.
Ai thotë se i ka kërkuar Silva Binos që të mos bëhej publik emri i tij dhe vëllait Robert Budina dhe ka marrë prej saj garancinë për këtë kërkesë.
Budina shton se do të ndjekë penalisht bërjen publik të lajmit nga ana e Kryeministrit për shkak të sheljes së të drejtave dhe lirive të njeriut.
Ashtu sikurse edhe vëllai i tij, edhe Edmond Budina thotë se nëse është e vërtetë që është infektuar, burimi është spitali ku ka shkuar për të vizituar hallën e sëmurë.
“Së pari dua të siguroj gjithë miqtë, shokët, të afërmit e simpatizantët, që më kanë bombarduar me mesazhe e telefonata, se gëzoj shëndet të plotë. Nuk kam as edhe një prej shenjave tipike të Covid-19, gjithsesi nuk kam të drejtë të paragjykoj rezultatin e testit, sepse mund të jem edhe bartës pa asnjë shenjë. Ajo që më bën të dyshoj, është fakti i këmbënguljes nga ana e Institutit të Shëndetit Publik, për të bërë testin edhe pse nuk kisha shenja të dukshme, ndërkohë, që të tjerë persona pranë nesh, edhe pse me shenja të dukshme (temperaturë të lartë) që kërkonin të bënin testin, ju refuzohej me justifikime nga më të ndryshmet.
Ata të gjithë, më pas, kanë dalë negativë. Përmes të afërmish të përbashkët i kam dërguar fjalë dr. Silva Binos, që pavarësisht prej rezultatit të testit, negativ ose pozitiv, emri im dhe i Bertit të mos bëhej publik. Më garantuan që jo. Testin e kam bërë dje rreth orës 18.40. Sot në orën 08:51 më telefonojnë për të më pohuar se unë e Berti jemi pozitivë. Pa kaluar as edhe një orë të gjitha mediat shpërndanë lajmin e infektimit tonë. Më e rënda është, që edhe Kryeministri Edi Rama, që duhet të jetë i pari në respektimin e Kushtetutës së vendit që drejton, bëri publikë emrat tanë. Ai ka detyrimin që publikisht të informojë opinionin se prej kujt e ka marrë lajmin. Prej institucioneve apo medias. Këtë çështje, unë do ta ndjek në rrugë ligjore, sepse ka të bëjë me shkeljen e të drejtave e lirive të njeriut”, shprehet Budina.
