Raporti i SHISH/ Dy llojet e vrasësve në Shqipëri, dhe sa paguhen për një ekzekutim

Shërbimi Informativ Shtetëror (SHISH), në raportin e publikuar për vitin 2019 ndër të tjera ka theksuar ndikimin e krimit të organizuar, korrupsionin, shërbimet jo-mike dhe terrorizmin si rreziqe për sigurinë kombëtare.

Në raportin e publikuar SHISH ka vënë theksin edhe në fuqizimin e grupeve kriminale dhe kontraktimin në rritje të vrasësve me pagesë.

SHISH ka deklaruar se ka informacione që këta individë përdorin identitete të ndryshme dhe disponojnë pasaporta origjinale ose false nga disa vende evropiane.

Edhe emisioni ‘Unpublished’ në Euroneës ka publikuar një emision kushtuar raportit të SHISH me theks tek kontraktimi i grupeve kriminale të vrasësve me pagesë.

Burime konfidenciale nga Policia e Shtetit për emisionin ‘Unpublished’ kanë treguar se Departamenti i Krimeve të Rënda disponon një listë me emrat e killerave që dyshohet se veprojnë dhe janë përfshirë në ngjarje kriminale.

Drejtues të policisë shprehen se deri tani janë përballur me dy lloje vrasësish me pagesë; ata që punojnë për llogari private dhe mund të kryejnë punë për llogari të disa bandave dhe individëve, dhe vrasësit apo të etiketuarit ndryshe si qitësit e një bande kriminale që rekrutohen vetëm për këtë qëllim.

Një vrasje me pagesë, nga ato që policia ka informacion dhe i ka zbardhur, shkon deri në 80 mijë euro. Vrasësit me pagesë konsiderohen nga bandat si një mënyrë efikase, e sigurtë dhe e vështirë për t’u gjurmuar.

LEXO EDHE  Koronavirusi në Greqi/ 95 humbje jete dhe mbi 10 mijë të infektuar në 24 orët e fundit

Por si mund të rekrutohen vrasësit me pagesë?

Ata mund të kategorizohen në dy grupe; kontigjent të botës së krimit me rekorde kriminale të hershme, dhe ish-pjesëtarë të Forcave Elitë shqiptare.

Në atentate të mirëorganizuara të pazbardhura nga policia, ka pasur gjithmonë dyshime për përfshirje të njerëzve të specializuar dhe trajnuar nga shteti, që për arsye të ndryshme kanë ndërruar rol, nga kundërshtarë të krimit, në “shërbëtorë” të tij.

Ata dyshohet se vijnë nga radhët e Forcave Speciale të Policisë, por dhe nga Forcat Komando të Ushtrisë. Këta persona janë edhe më të kërkuarit dhe të paguarit në tregun e vrasësve me pagesë. Kjo për dy arsye kryesore: Nuk gabojnë thuajse asnjëherë dhe janë të trajnuar me metoda të sofistikuara për të mos u zbuluar.

“Edhe mua më rezulton në një studim që kam bërë, në vitet 1995-1997, që elementë që vinin nga Forcat Speciale, ishin kapot e grupeve, dhe pikërisht sepse ata duke u përgatitur mësojnë shumë gjëra. Këtu në Shqipëri duhet të ketë një ligj, për të gjithë elementët që ikin nga radhët e Forcave Speciale, që të mbahen në vëzhgim të skedohen nga shteti, pasi janë shumë të rrezikshëm.

Për shembull kapo i Lushnjës asokohe, tani në burg (Aldo Bare) ishte nga Forcat Speciale”, thotë Bujar Rama, ish/zv drejtor i SHISH.