Nga BoldNews.al
Biznesmeni afrikan Delish Nguvaja do të qëndrojë në burg, ndërkohë që autoritetet e Zimbabves po hetojnë shqiptarin Klodian (Mirel) Mërtiri, i prezantuar atje me emrin Ilir Dedja, pronar i kompanisë së këshillimit, “Drax Consult SAGL”, e cila fitoi në mënyrë të dyshimtë një tender 60 milionë dollarë për furnizimin me pajisje anti-Covid.
Një gjykatës në kryeqytetin e Zimbabves, Harare, refuzoi kërkesën e Ngujavas për lirim me kusht.
Për gjykatën, biznesmeni kontrovers, i cili ka luajtur rolin e përfaqësuesit të “Drax SAGL” mund të ndikojë në provat dhe dëshmitarit e procesit hetimor, në të cilin rezultojnë të përfshirë edhe anëtarë të familjes presidenciale të shtetit afrikano-qendror.
Autoritetet në Zimbabve janë të bindur se kompania “Drax” e Ilir Dedjas, ose siç njihet në Shqipëri Klodian (alias Mirel) Mërtiri, njeriu-hije i inceneratorëve, ka mashtruar shoqërinë shtetërore të shëndetësisë, “Natpharm”, në tenderin për furnizim 60 milionë dollarë për pajisje mjekësore dhe medikamente anti-Covid 19
Për prokurorët e shtetit afrikan, “Drax SAGL” ka përfituar tenderin në Shëndetësi, ndërkohë që nuk ka asnjë lloj aktiviteti në këtë fushë. Objekti i kompanisë së Klodian Mërtirit (Ilir Dedja), e regjistruar në Zvicër është shërbim këshillimor.
Skandali 60 mln USD
Delish Nguvaya, një mik i ngushtë i familjes presidenciale të Zimbabves, Mnangagëa, është personi i parë që akuzohet për një skandal të furnizimit me pajisje mjekësore shumë-milionëshe Covid-19.
“Drax Consult SAGL” nënshkroi kontrata me vlerë 60 milionë dollarë amerikanë me qeverinë e Zimbabves për furnizimin me barna dhe pajisje mjekësore të “NatPharm”, kompania shtetërore, e cila merret me të gjitha prokurimet që lidhen me shëndetin për spitalet publike.
Qeveria në Zimbabve ka anuluar kontratat. Por, reagimi ishte disi i vonuar, pasi “Drax SAGL” kishte transferuar miliona dollarë në llogari bankare të hapura në Hungari dhe Mauritius.
Prokurorët akuzojnë Nguvaya dhe partnerin e tij, me origjinë nga Shqipëria Ilir Dedja (Klodian Mërtiri), për mashtrim. Ata e kanë prezantuar “Drax SAGL” si një “kompani farmaceutike me qendër në Zvicër”.
Por në fakt, “ajo është thjesht një kompani këshilluese, pa asnjë përvojë në prodhimin e ilaçeve dhe produkteve mjekësore”.
Dedja (Klodian Mërtiri) dhe Nguvaya dyshohet se, fillimisht ata iu ofruan qeverisë së Zimbabves për të furnizuar me medikamente, nëpërmjet një kompanie të tretë. Kjo tentativë u rrëzua, pasi verifikimet mbi procedurat u shoqëruan me probleme.
Në gusht 2019, dyshja Mërtiri-Nguvaja rikthehen në bisedime me qeverinë në Zimbabve, kësaj radhe me kompaninë “Drax Consultin SAGL”. Qëllimi ishte furnizimi me pajisje mjekësore, për një vlerë 20 milionë dollarë.
Ministri i Shëndetësisë i asaj kohe, Agnes Mahomva, dyshohet se veproi në favor të “Drax SAGL”, duke bindur Ministrinë e Financave, kompaninë shtetërore “Natpharm” dhe Autoritetin e Prokurimeve, që të pranonin një kontratë me “Drax SAGL”.
“Drax” dyshohet se furnizoi pajisje me vlerë 2 milionë dollarë, në vijim të asaj kontrate, ndërkohë që do të paguhej me këste për pjesën tjetër të shumës së mbetur, 18 milionë USD
Prokurorët thonë se kompania e Ilir Dedja (Klodian Mërtiri) hyri në marrëdhënie me shtetit, “përmes mashtrimit”.
Pas kontratës së parë, Nguvaja, në cilësinë e përfaqësuesit të ‘Drax SAGL”, shfaqet me një ofertë të re, në një tender 40 milionë dollarë.
Të dhënat publike dëshmojnë se kompania e shqiptarit Ilir Dedja (Klodian Mërtiri), kishte shumëfishuar vlerën e furnizimit të materialeve mjekësore.
Ndërkohë, Interpol Budapesti po kryen verifikime mbi një transfertë 2 milion dollarë të kryer nga “Drax SAGL” në një bankë të nivelit të dytë në Hungari.
Autoritetet hungareze dyshojnë se ‘Drax SAGL” është pjesë e një zinxhiri kompanish, të cilat sigurojnë financime për krimin e organizuar.
