Ditën e sotme para godinës së qeverisë së Kosovës është zhvilluar një protestë lidhur me ndalimin e dasmave në Kosovë.
Ish-ministri Vitia ka marrë një vendim për ndalimin e organizimit të dasmave dhe gëzimeve të tjera familjare, ndaj këngëtarët kanë protestuar në mënyrë që ministri i ri ta anullojë këtë vendim. Sipas tyre, vendimi për ndalimin e dasmave do të ndikonte shumë te artistët, pasi sezoni i verës është e vetmja mundësi që kanë për të mbajtur familjen.
Në protestë ishin edhe disa nga emrat më të njohur të muzikës kosovare, si: Labinot Tahiri, Afrim Muqiqi, Edi Furra, Edona Llalloshi, Alban Mehmeti etj.
Labinot Tahiri ka reaguar i i revoltuar duke thënë se koronavirusi është një gënjeshtër.
“Kjo është gënjeshtër, mua le të më dërgojnë në burg, edhe ty edhe të gjithë estradën, por kjo është gënjeshtër. Kjo bëhet vetëm për të diskriminuar, kinse të na ulin modestinë dhe krenarinë që na i ka dhënë Zoti”, u shpreh ai.
“Asgjë, asnjë Qeveri as Shteti nuk ka bërë asgjë për ne, asnjëherë, as për Nexhmije Pagarushën para se të vdiste. Këtu ku jemi ne do të duhej të ishte busti ose një shenjë për yllin tonë shqiptar, Nexhmije Pagarushën, por kur vdiq ia nisën lot krokodili”, tha Labi.
