Nga Boldnews.al
Maturantët duhet të ndryshojnë meme dhe postera në protestën e tyre para Ministrisë së Arsimit. Le ta lënë paksa të qetë: “Turin që ishte në barkë” dhe të bëjnë një pyetje thelbësore, logjike dhe me katër alternativa, ashtu si testi i Gjuhë-Letërsisë.
A e di Ministrja e Arsimit Besa Shahini çfarë është ‘metodika e Pizës’ dhe a mund të aplikohet ajo në kushtet e një situatë kaotike, ku shkolla është mbyllur që në mars për shkak të pandemisë?
Atlernativat për këtë pyetje janë: A-ministrja nuk e ka idenë çfarë thotë; B-ministrja nuk do e kalonte as vetë maturën me testin e Gjuhë-Letërsisë; C-ministrja është aty sepse e ka kërkuar Baca Baton dhe D-ministrja përveç padijes së theksuar është edhe arrogante. Ky është rasti i rrallë që maturantët duhet të rrethojnë të “katër alternativat”, pasi fatkeqësisht të gjithë përgjigjet jo vetëm janë të përafërta, por të sakta.
Këto pyetje nuk mund të jenë vetëm ironi, por një e vertetë e hidhur që sot rëndon mbi shpinën e 31 111 maturantëve në të gjithë vendin, përfshi edhe prindërit e tyre që pritën me ankth si do të dilnin nga provimi i Gjuhë-Letërsisë që u zhvillua më 11 qershor.
Ministrja doli sot në një video-mesazh që në vend të fliste qoftë edhe për “ulje gjakrash” që do të rishikohen pretendimet e maturantëve, ajo gati i kërcënoi haptas, duke shprehur mllef dhe ngatërruar “kekun me suxhukun”, ku reagimin e atyre mijëra maturantëve në të gjithë vendin i konsideroi si të nxitura politikisht.
Menjëherë pasi ministrja Besa Shahini doli në atë vide-mesazh, plot mllef dhe arrogancë, në faqen e saj në facebook, mbërritën një numër i madh komentesh kundër. Pa e fyer, por duke i kujtuar se jo vetëm ishte jashtë logjike në gjithçka, por qoftë edhe me padijen e saj po dëmton një brez të rinjsh, që në të ardhmen mund të jenë pikërisht në atë kolltuk të “rëndë” që Shahinin ia kanë bërë me “porosi”, nga Prishtina në Tiranë.
Edhe pse u angazhuan qindra komentues nga zyrat e Partisë dhe Rilindjes së Edi Ramës, për ti dalë në mbrojtje ministreshës së tyre, duket se edhe ata hoqën dorë, kur forca e mijëra komentuesve ishte shumë më e madhe se të punësuarit e partisë.
Sipas atyre ekspertëve tërësisht të pavarur nga Rilindja, apo çdo forcë tjetër politike në vend, janë të paktën shtatë pyetje tërësisht alogjike, të cilat penalizojnë çdo nxënës, sado që mund të jetë ekselent. Dhe janë 7-10 pyetje, që përkthehen në minus dhjetë pikë që do rëndojnë mbi maturantët. E këtë dhjetë, kjo ministre e ardhur nga skutat e OJF-ve të financuara nga Xhorxh Soros, sot nuk mund ta kalojë pa të keq.
Më së paku duhet të kuptojë se pikërisht ky personazh si Shahini vetëm në dy vite ka parë poshtë zyrës së saj mijëra studentë në vitin 2018, që i “hëngrën kokën” shefes Lindita Nikolla dhe në qershor 2020 mijëra maturantë. Këtu ka diçka që nuk shkon, me arsimin në tërësi, por veçarisht atë të mesëm dhe të lartë.
Metodikat mësimore të kopjuara nga vendet e tjera nuk mund të aplikohen si “ligjet e parlamentit” ku edhe më injoranti i Rilindjes, ngren duart përpjetë për miratim, pa i studiuar e sigurisht pa i kuptuar kurrë.
Gjithashtu kryeministri dhe ministrat e tij po e kuptojnë fort mirë që me politikat që ndjekin do të bëjnë që të largohet edhe ajo pjesë e mbetur e popullsisë, për të mos vrarë më së paku të ardhmen e fëmijëve të tyre, duke i larguar nga duart e keqdashësve kinse dhe injrantëve të “formuar rrugës”, që sot i gjen në elitën e pushtetit.
Arroganca nuk është arsye dhe Shahini është së fundmi emblema e një klithjeje që sot kërkon një zgjidhje. Shumë u ankuan për paaftësinë e ish-ministres së Arsimit Lindita Nikolla, por kjo që e pasoi do të futet në histori si e paditura që është edhe arrogante!
