Fatmira Hajdari u përball sot me vetting në KPK, ku sipas hetimit administrative rezultoi se nuk justifikonte një pasuri me mbi 60 mln lekë, ndërkohë që edhe sipas DSIK ajo nuk është e përshtatshme për të vijuar karrierën.
Në të njëjtën ditë, gjyqtarja e Apelit, Fatmira Hajdari, është përballur edhe me një akuzë publike nga ish-Kreu i Komunitetit Mysliman Shqiptar, Skënder Bruçaj.
Në një postim në rrjetet sociale, Bruçaj akuzon gjyqtaren Hajdari se në vitin 2015, me një vendim gjyqësor absolutisht të pa drejtë, ka kontribuuar që ti grabitet një nga pronat shekullore vakëf të Komunitetit Mysliman të Shqipërisë.
“Gjatë detyrës time si kryetar i KMSH jam përballuar me një nga vendimet më të padrejta nga gjyqësori shqiptar. Fatmira Hajdari në vitin 2015, me një vendim gjyqësor absolutisht të pa drejtë, haptazi dhe në kundërshtim me ligjin dhe provat, ka kontribuar që ti grabitet një nga pronat shekullore vakëf të Komunitetit Mysliman të Shqipërisë. Çështja tani është në gjykatë të lartë dhe jam i bindur që dikur drejtësia do vendoset”, shkruan Bruçaj.
Në vijim ai thekson se “zonja Hajdari edhe mund ta kaloje këtë Vettingun e drejtësisë në këtë botë, por jam i bindur se në botën e përtejme do të përballët me drejtësinë absolute të Zotit”.
Madje ish-kreu i KLSH i është drejtuar edhe me një këshillë anëtarëve të sistemit gjyqësor.
“Të kontribuosh që të vendoset drejtësia në vend konsiderohet si adhurim si një punë shumë fisnike para Zotit, por në të njëjten kohë, kur zgjedh të bësh padrejtësi me qëllim të keq, ta dini se keni bërë një nga veprimet më të urryera nga Zoti.Dënimi në botën tjetër është i pashmangshëm.
O ju që besuat, vazhdimisht të jeni dëshmues të drejtë pë hir te Allahut edhe nëse është kundër (interesit) vetes suaj, kundër prindërve ose kundër të afërmve, le të jetë ai (për të cilin dëshmohet) pasanik ose varfanjak, pse Allahu di më mirë për ta.Mos ndiqni pra emocionin e ti shmangeni drejtësisë! “Nëse shtrembëroni ose tërhiqeni, Zoti është i njohur hollësisht për çka punoni”. (Kur`ani, Nisa: 135)”, shkruan Bruçaj.
Ndërkohë, KMSH në vitin 2015 i është drejtuar Presidentit të Republikës, Kryetarit të Kuvendit, Kryeministrit, institucioneve ndërkombëtare të akredituara në Tiranë, si dhe mbarë opinionit publik shqiptar, mbi ggrabitjen e pronës qindra vjeçare vakëf, që ndodhej pranë Dhomës së Tregtisë, në qendër të Tiranës.
“Pas shtetëzimit nga sistemi ateisto-komunist, akoma edhe pse ka kaluar një çerek shekulli liri e besimit, si dhe pas një kalvari gjyqesh dhe ndjekjesh të të gjitha formave, individi Ali Pazari në bashkëpunim me biznesmenin Fatmir Xhaferi, duke përdorur format e mashtrimit dhe me ndihmën e trupit gjykues të Gjykatës së Apelit, kryesuar nga gjyqtarja Fatmira Hajdari, me një vendim gjyqësor haptazi në kundërshtim me ligjin dhe provat, kanë grabitur pronën shekullore vakëf të Komunitetit Mysliman të Shqipërisë.
Institucioni ynë dënon fuqishëm këtë akt të paprecedent dhe ndërkohë ka ndërmarrë të gjitha hapat e duhur ligjorë për ndjekjen e kësaj çështjeje në instancat më të larta të drejtësisë, duke e ankimuar këtë vendim.
Komuniteti Mysliman i Shqipërisë i bën thirrje Gjykatës së Lartë, që të vendosë drejtësi sa më shpejt lidhur me këtë pronë të shenjtë vakëf”, thuhej në reagimin e KMSH.
