Maturantët sërish në protestë, qëllojnë me vezë godinën e Ministrisë së Arsimit (VIDEO-FOTO)

Për të dytën ditë radhazi, maturantët kanë protestuar sërish para Ministrisë së Arsimit. Protesta vjen pas realizimit të provimit të Gjuhë-Letërsisë, për të cilin maturantët janë shprehur se kishte pyetje jashtë programit.

Gjatë deklaratave nga protesta, ata u shprehën se ndihen të ofenduar nga deklaratat e ministres së Arsimit Besa Shahini, e cila një ditë më parë e cilësoi protestën e tyre partiake.

Maturantët kanë qëlluar me vezë godinën e Ministrisë së Arsimit.

Ata kanë dalë me një listë kërkesash duke kërkuar rivlerësimin e provimit dhe mos vlerësim të disa pyetjeve.

Kërkesat

1-Zgjerimi i kufijve të notave.

2-Nota e provimit të letërsisë të llogaritet me 40% të notës aktuale të provimit dhe 60% të notës së letërsisë së gjimnazit.

LEXO EDHE  I dënuar me 25 vite, Genc Tafili bllokon ekstradimin drejt Shqipërisë/ Kërkon azil në Gjermani

3-Hartuesit t’u përmbahen kompetencave bazë të nevojshme për studimet universitare apo për ecurinë e mëtejshme në jetë.

4-Për klasat e 12-ta, në muajin e parë të vitit akademik të përcaktohet qartë tipologjia e pyetjeve të testit, që ky model të ndihmojë në mënyrë korrekte për provimin e lëndës.

5-Nxjerrja e çelësit të provimeve të mëtejshme brenda 2 orësh pas mbarimit të testit.

6-Në përgatitjet e testeve të merret mendimi nga një përfaqësi e mësuesve të lëndës së letërsisë nga gjimnazet e Shqipërisë me mbi 400 maturantë.