Pavarësisht se ka fituar çdo trofe të mundshëm individual dhe kolektiv përgjatë karrierës së tij, shpesh Leo Messi është kritikuar për mungesën e suksesit me Argjentinën.
Synimi i Leo Messit është Botërori por pa anashkaluar edhe Kupën e Amerikës. “Pleshti” do të ketë edhe dy mundësi për të fituar një nga këto trofe, në verën e vitit 2021 do të zhvillohet Kupa e Amerikës, ndërsa një vit më vonë Botërori i Katarit.
Ndërkohë, ish-sulmuesi i Barcelonës, Hristo Stoichkov, ka deklaruar se dëshiron ta shohë Le Messin kampion bote dhe për këtë do të dhuronte “Këpucën e Artë” që ka fituar në Botërorin e vitit 1994.
“Do të isha gati të jepja “Këpucën e Artë” që fitova pas Botërorit 1994, për të parë Leo Messin kampion bote. Nuk dua ta shoh që të vuajë për faktin që nuk ia ka dalë të fitojë një Botëror. Messi është një legjendë. Atë që po bën me Barcelonën nuk do e përsërisë askush.
Nuk besoj se do të shohim sërish një futbollist të tillë. Më ka befasuar prej herës së parë që e pashë, 12-13 vite më parë. Ai vazhdon të më befasojë edhe sot. Kjo nuk vlen vetëm për aspektin futbollistik, por edhe për njeriun që është. Leo i ndihmon gjithmonë ata që kanë nevojë“, deklaron Stoichkov.
