Gjykata ka vendosur të ekstradojë drejt Gjermanisë shtetasin nga Taxhikistani, Komron Zukhurov, i akuzuar si pjesë e celulave të ISIS.
I riu nga Taxhakistani u arrestua në fund të muajit Prill. 24-vjeçari Zukhurov, kishte mbërritur nëpërmjet aeroportit të Rinasit në Shqipëri më 17 shkurt të këtij viti.
Policia njoftoi zyrtarisht, se ai ishte arrestuar në Bulevardin “Dëshmorët e Kombit” dhe se kërkohej për llogari të Antiterrorit gjerman si pjesëtarë i një cellule terroriste që vepronte në atë vend.
Zukhurov, që nga 17 shkurti ka jetuar në kryeqytetin shqiptar i strehuar në një familje taxhakistaneze dhe ka lëvizur lirisht. Zukhurov ishte shpallur në kërkim nga Interpoli dhe autoritetet e antiterrorist gjerman, pasi ndaj tij ishte lëshuar urdhër-arresti ndërkombëtar për veprën penale “Pjesëmarrje në një organizatë të huaj terroriste”. Ai është i dyshuar si anëtar dhe pjesëmarrës i kësaj organizate të huaj terroriste, e themeluar si celulë terroriste në Gjermani për të bërë xhihad në emër të shtetit islamik (ISIS).
Prokurori i Përgjithshëm i Taxhikistanit ka akuzuar Komron Zukhurov si anëtar të partisë së “Rilindjes Islamike të Taxhikistanit” (IRPT), forcë politike në opozitë kjo e konsideruar si organizatë terroriste edhe nga Bashkimi Europian.
Në datë 15 prill në Gjermani nëpërmjet një operacioni të gjerë u godit celula terroriste ku bënte pjesë edhe 24-vjeçari i arrestuar në Tiranë.
