Cristiano Ronaldo mund të largohet nga Juventus në fund të sezonit, vetëm dy vite pas transferimit të tij në Torino nga Real Madrid.
Ronaldo, 35 vjeç, bëri një lëvizje të papritur te kampionët e Serie A, në vlerën e 100 milion eurove, në korrik të vitit 2018, pas nëntë sezoneve spektakolare me “Los Blancos”.
Arsyeja zyrtare për këtë transferim është se portugezi ishte në kërkim të sfidave të reja, ndërsa mediat spanjolle në atë kohë, deklaronin se portugezi kishte kërkuar largimin pas mosmarrëveshjeve me presidentin e klubit, Florentino Perez.
Ndërkohë karriera e tij në Itali, duke marrë parasysh edhe moshën e tij të avancuar, ka qenë shumë e suksesshme pasi deri më tani ka shënuar 42 gola në 52 ndeshje në kampionat por gjithashtu është shfaqur vendimtar për bardhezinjtë edhe në Ligën e Kampioneve, pavarësisht eliminimit nga Ajaxi sezonin e kaluar.
Sidoqoftë sipas “Radio Rossonera”, kapiteni i Portugalisë tani po mendon të largohet nga klubi edhe pse duket si një skenar shumë i vështirë për tu realizuar.
Ashtu siç raporton “Sport Mediaset”, pasiguria për të ardhmen e tij u shtua gjatë krizës së koronavirusit, dhe u përfol se largimi i tij do të lehtësonte balancat financiare të klubit Italian të dëmtuara nga pandemia.
Nuk ka asnjë indikacion të klubeve të interesuara për të, megjithëse gjigandët e Ligue 1 “Paris Saint-Germain” kanë qenë admirues afatgjatë të portugezit.
