Teksa po afron data për dorëzimin e bilancit, Qendra Kombëtare e Biznesit ka rikujtuar bizneset që ta shoqërojnë edhe me listën e aksionerëve. Kjo vlen për të gjithë shoqëritë aksionere që kanë ndryshim në këtë aspekt dhe deklarimi duhet të bëhet pasi është kërkesë e ligjit “Për regjistrimin e Biznesit” që u miratua vitin e shkuar.
“Mbështetur në nenin 43, pika 4, të ligjit 9723 “Për Regjistrimin e Biznesit” i ndryshuar, shoqëritë aksionare së bashku me bilancin vjetor kontabël dhe raportin e auditimit, duhet të njoftojnë në rast se kanë kryer ndryshime, listën e plotë të aksionerëve të regjistruar me të dhënat e tyre të identifikimit për aksionet nominative, si dhe numrin e përgjithshëm të të gjitha aksioneve të saj.:
Referuar nenit 3, 3/1 të ligjit 30/2019, për disa shtesa dhe ndryshime në ligjin Nr. 9723 “Për Regjistrimin e Biznesit” i ndryshuar, mosrespektimi i detyrimit të përcaktuar në pikën 4, të nenit 43, të këtij ligji, përbën kundravajtje administrative dhe dënohet me gjobë në masën 100 000 lekë.:
Referuar dispozitës së sipërcituar, përditësimi i listës së aksionarëve duhet të depozitohet në regjistër në një aplikim të veçuar nga bilanci, në mënyrë që gjëndja e regjistrit të jetë e përditësuar sipas gjendjes së re të shoqërisë.:” thuhet në njoftimin e QKB.
Më herët për shkak të situatës ishin Tatimet që njoftuan se bilanci kontabël, së bashku me anekset e tij, si dhe çdo e dhënë tjetër e përcaktuar në udhëzimin e Ministrit të Financave nr.5 datë 30.01.2006, “Për tatimin mbi të ardhurat”, i ndryshuar, në zbatim të ligjit “Për tatimin mbi të ardhurat”, dorëzohet brenda datës 31 Korrik 2020.
Për tatimpaguesit me qarkullim deri në 14 milionë lekë, tatimi i llogaritur në bazë të deklaratës vjetore të të ardhurave të tatueshme, pakësuar me shumat e përcaktuara sipas nenit 37 të Ligjit nr. 8438, dhe me parapagimet e bëra gjatë periudhës tatimore, paguhet nga tatimpaguesi me urdhërpagesën përkatëse, brenda gjashtë mujorit të dytë 2020. /Monitor/
