Ish-lojtari i Partizanit, Edmond Dosti, ka reaguar ashpër për krizën e rezultateve që po kalon skuadra.
Dosti opinionet e tij i ka shprehur me anë të një postimi në rrjetin social “Facebook”, ku i kërkon presidentit të klubit, Gazmend Demi, shkarkimin e Adolfo Sormanit.
Ai e ka akuzuar trajnerin italian duke deklaruar se klubi i Partizanit nuk është në interesin e tij dhe se i interesojnë vetëm paratë që merr nga ky klub.
Postimi i ish-sulmuesit:
“Zoti Demi vendos dinjitetin tënd në radhë të parë dhe atë të Partizanit, duke e shkarkuar këtë dështak. Çdo dite që kalon aty është në dëmin tuaj dhe të Partizanit. Mendohu mirë!
Ditën që more ekipin the se objektivi është Kupa dhe titulli kampion dhe nuk the se më këta lojtarë nuk fitohet asgjë, pse kështu justifikohesh, në momentin që ti pranove të drejtosh do të thotë se kualiteti i lojtarëve ishte, por ti nuk ke aftësi për të drejtuar (je bërë Panuçi Nr. 2, që sa herë humbte thoshte e kanë fajin lojtarët, je i vetmi trajner në botë që nuk mbron as lojtarët e tu dhe nuk merr përgjegjësi mbi vete), por ke dashur vetëm lekët e Gaz Demit. Sepse ai besoi tek ty një kontratë 2.5 vjeçare, edhe si dështak qe je nuk pranon dorëheqjen sepse të interesojnë vetëm paratë dhe jo Partizani. Turp turp turp…!”, shkruan Dosti.
