Një çift të moshuarish janë transportuar me urgjencë tek spitali Infektiv në Tiranë.
Ata janë konfirmuar si të infektuar nga Covid-19, ndërsa deri më tani nuk kanë shfaqur komplikacione të rënda shëndetësore.
Burime për News 24 bëjnë me dije se bashkë me çiftin e të moshuarve ka arritur në 15 numri i pacientëve të infektuar me Covid-19 që janë paraqitur tek Infektivi në harkun e 24 orëve.
Po ashtu, bëhet me dije se ka edhe disa persona të shëruar nga koronavirusi, të cilët kanë lënë ambientet e spitalit dhe u janë drejtuar banesave të tyre.
Sipas të dhënave zyrtare, ditën e sotme u raportuan 42 raste të reja me koronavirus në 24 orët e fundit.
Ndërkohë, në spitalin Covid 1 janë shtruar 46 pacientë, 8 prej të cilëve në terapi intensive dhe një i intubuar.
