Pas shtimit të rasteve te reja të të prekurve me koronavirus në vendin tonë, specialistët e ISHP tërheqin vëmendjen për të gjithë qytetarët, duke u kujtuar atyre se “situata e Covid 19 është përkeqësuar”.
Në 24 orët e fundit u raportuar 36 raste, nga të cilat 27 raste i përkasin Tiranës.
“Kjo situatë nuk ishte kaq e papritshme për shkak të grumbullimeve masive që kanë ndodhur ditët e fundit. Jo vetëm grumbullimet, por edhe mosrespektimi i këshillave, në lidhje me distancimin fizik, në lidhje me mbajtjen e maskave, në lidhje me shumë elementë të tjerë të kujdesit personal qoftë edhe të higjienës”, tha Silva Bino, gjatë deklaratës së sotme të Ministrisë së Shëndetësisë.
Sipas saj, “të gjithë qytetarët, të gjithë ne duhet të jemi të përgjegjshëm që Covid-19 nuk ka ikur nga vendi jonë. Deri më tani, deri në fillimin e hapjes së masave kishim një numër një shifror, e cila erdhi si rezultat i masave drastike, i sakrificës së gjithësecilit. Por kjo nuk do të thotë që me hapjen e masave ne të shpërdorojmë çdo këshillë dhe të shpërdorojmë atë që ne vetë sakrifikuam”.
Dita e sotme shënon edhe numrin më të lartë të të prekurve me Covid-19, por njëherazi edhe numrin më të lartë të testimeve, mbi 350, që ka bërë ISHP që prej fillimit të pandemisë.
