Këshilli Politik për reformën zgjedhore pritet të mblidhet sot në orën 19:30. Mësohet se mbledhja e sotme është thirrur nga OSBE, ndërsa pjesëmarrjen e ka konfirmuar edhe opozita e bashkuar me përfaqësues Oerd Bylykbashin dhe Petrit Vasilin.
Mbledhja pritet të diskutojë pikat e agjendës së punës së Këshillit Politik, ndërkohë që zyrtarisht ende nuk ka një përgjigje nga opozita e bashkuar nëse e pranon ose jo marrëveshjen me mazhorancës, ashtu sikundër ka deklaruar Ambasadorja Yuri Kim.
Por burime nga opozita shprehen se marrëveshja do të pranohet, me kushtin që zbatimi i saj të garantohet nga diplomatët e angazhuar në procesin e dialogut për arritjen e konsensusit. Kjo do të thotë se opozita pritet të kërkojë garanci nga Ambasadorja Yuri Kim, Duncan Norman dhe Luigi Soreca, për respektimin dhe zbatimin e marrëveshjes nga ana e Qeverisë.
Marrëveshja që pritet të dakordësohet përmban 11 pika.
Mbledhja e sotme e Këshillit Politik pritet të diskutojë mbi çështje të tjera teknike lidhur me procesin zgjedhor, çka duket se do të ketë një produkt të pranuar që do të përbëjë edhe Kodin e ri Zgjedhor.
Në ditët e fundit kreu demokrat është angazhuar në një proces konsultimesh me ekspertët e opozitës për reformën zgjedhore, drejtues të partive opozitare, por edhe ambasadorin gjerman.
Pika që duket se mban peng arritjen e një konsensusi është formula mbi administrimin e procesit zgjedhor, pra përbërja e Komisioneve Zgjedhore dhe Grupeve të Numërimit. Sipas draft-marrëveshjes të arritur me ndërhyrjen e diplomatëve, komisionet zgjedhore dhe grupet e numërimit do të jenë të depolitizuara, ndërsa partitë do të kenë 4 vëzhgues, dy nga qeveria dhe dy nga opozita. Paralelisht me këtë, është dakordësuar identifikimin biometrik i zgjedhësve në të gjithë vendin.
Ndërkohë opozita pritet të propozojë sot formulën me 5 anëtarë të Komisioneve Zgjedhore, ku 4 do të jenë përfaqësues të qeverisë dhe opozitës, dhe i 5 do të jetë i depolitizuar. Gjithashtu një kusht tjetër i opozitës është që punonjësit e administratës publike që do të angazhohen në Komisionet Zgjedhore dhe Grupet e Numërimit nuk duhet që të jenë punësuar në administratë vitin e fundit.
