Në një kohë që OSBE hyri si ndërmjetëse për të thirrur një mbledhje të Këshillit Politik pasditen e sotme, KryeministriEdi Rama dhe kreu demokrat Lulzim Basha kanë nisur takimet me përfaqësuesit e tyre në këtë këshill.
Sikundër raportohet, në selinë e PD-së është zhvilluar takimi mes Bashës, Kryemadhit, Vasilit dhe Bylykbashit, ndërsa në godinën e Kryeministrisë Rama ka takuar Damian Gjiknurin.
Nga burime jozyrtare mësohet se mbrëmjen e sotme palët mund të dakordësojnë një draft final për reformën zgjedhore me 11 pika, përfshi këtu edhe formulën e komisioneve zgjedhore dhe grupeve të numërimit.
Pavarësisht se në ditët e fundit është folur për një administratë zgjedhore të depolitizuar, opozita e bashkuar, pritet të paraqesë një variant ku anëtarët e komisioneve zgjedhore dhe grupeve të numërimit, të jenë mikes, pra edhe me përfaqësues të forcave politike.
Burimet shprehen se një nga variantet është që komisionet të kenë 5 anëtarë, njëri prej të cilëve, Kryetari të jetë i depolitizuar.
Një tjetër variant është që komisionet të kenë 7 anëtarë, ku 3 anëtarë të jenë të depolitizuar dhe 4 të tjerët të ndahen 2 të qeverisë dhe 2 të opozitës.
Nuk dihet nëse socialistët, që përfaqësohen në tryezë me Damian Gjiknurin, do të pranojnë një formulë të tillë apo jo. Gjithashtu opozita e bashkuar kërkon që anëëtarët e depolitizuar të komisioneve të kenë një eksperiencë në administratë jo më pak se 1 vit.
