Komisioni Evropian ka rritur fondet e mbështetjes për vendet e Ballkanit në propozimin për buxhetin shtatë vjeçar, ndërsa sugjeron edhe mjete të tjera mbështetëse.
Gjatë prezantimit të planit në Bruksel, Komisioneri evropian për zgjerimin dhe fqinjësinë, Oliver Varhelyi, renditi ndihmat dhe mbështetjen financiare që blloku evropian do të sigurojë për vendet e rajonit.
Një prej tyre është garancia e investimeve të jashtme që do të dyfishohet nga 60 në 130 miliard, fond nga i cili përfiton dhe Ballkani.
Varhelyi theksoi se Fondi Evropian për Zhvillimin e Qëndrueshëm, do të pajiset me 1 deri ne 2 miliard euro shtesë brenda këtij viti, nga ku mund të përfitojnë dhe vendet e rajonit.
“Propozojmë rritjen në nivelin e 14.5 miliard eurove në kuadrin e ardhshëm financiar. Kjo do të na mundësojë që në vjeshtë të vijmë me një plan të rëndësishëm dhe domethënës ekonomik për zhvillimin dhe investimet për rajonin e Ballkanit Perëndimor”, tha Oliver Varhelyi, Komisioneri Evropian për Zgjerimin dhe Fqinjësinë.
Sipas komisionerit, investimet do të jenë në fusha si energjia, transporti, ekologjia dhe teknologjia. Propozimi i Komisionit për buxhetin e ri duhet të marrë dhe miratimin e Parlamentit dhe të vendeve anëtare të përfaqësusuara në Këshillin e BE-së, brenda fundit të këtij viti./euronews.al
