Ambasadorja amerikane në Tiranë, Yuri Kim ka reaguar pas deklaratës së gazetarit Cim Peka.
Në një postim në Twitter, Yuri Kim shpërndan një artikull të publikuar nga një media pranë qeverisë që raporton lidhur me deklaratën e gazetarit Peka për një bisedë mes ambasadores dhe kryetarit të opozitës Lulzim Basha.
Mes të tjerash, në artikull shkruhet: “Sipas gazetarit, Basha ka zhvilluar një telefonatë të ashpër me ambasadoren, duke i thënë se nuk është Lul Basha, por kryetar i opozitës. ‘Ka pasur një bisedë të fortë nga kryetari i opozitës Basha dhe ambasadores amerikane, Yuri Kim. Bisedë me tonë shumë të ashpra. Burime e mia bëjnë me dije se zoti Basha i ka bërë me dije ambasdores se ‘unë nuk jam Luli Basha, por jam kryetari i opozitës. Nëse vazhdoni të jeni në lojë me Ramën, vazhdoni me të’. Një bisedë e ndërtuar me shumë si pretencë. Vetëm pas kësaj bisede kemi takimin me Këshillin Politik. Opozita dje bëri një ofertë për takim. Deri në momentin e kësaj telefonate nuk ka pasur asnjë axhendë për takim,’ thotë Çlirim Peka”.
Në reagimin e saj, Kim shprehet se “kjo është pa sens”, ndërsa shton se ai (Basha) më thërret ‘Yuri’ dhe unë e thërras ‘Luli’. Pse? Sepse ne jemi kolegë dhe shokë”.
