Rudina Hajdari tha se takimi në rezidencën e Ambasadores së SHBA-së Yuri Kim ka nisur në orën 12:30 dhe ka përfunduar rreth orës 20:30.
Hajdari në emisionin Opinion ka zbardhur detaje nga takimi që u zhvillua sot mes 3 diplomatëve dhe 4 anëtarëve të Këshillit Politik, duke u shprehur se administrate zgjedhore është një çështje e nxehtë, e cila ndan palët.
“PS kërkon një administratë zgjedhore tërësisht të depolitizuar, ndërsa opozita e bashkuar kërkon një depolitizim të pjesshëm.
Përsa i takon Kolegjit Zgjedhor, duket se është një çështje që do të zgjidhet. Gjithashtu edhe identifikimi biometrik i votuesve është një çështje që opozita e bashkuar dhe PS ende nuk kanë rënë dakort”, tha Hajdari. Sipas saj, duket se për identifikimin biometrik në të gjithë vendin është rënë dakort.
Hajdari tha se ndërkombëtarët në këtë proces janë shtytës në këtë proces.
Lidhur me ndryshimin e sistemit zgjedhor, Hajdari tha se palët janë në dijeni të propozimeve të mia, por në tryezë e kanë shmangur.
