Ish-deputeti demokrat Enkelejd Alibeaj akuzon Partinë Socialiste si penguesen për mos arritjen e konsensuit për reformën zgjedhore në Këshillin Politik, brenda datës 31 maj.
Në një intervistë për Ora News, Alibeaj shprehet se PS nuk do që të bëhet reforma zgjedhore, duke shtuar se Edi Rama do të bëjë një reformë të njëanshme.
“Përderisa ne nuk jemi në parlament, Rama mund ta bëjë vetëm, i ka votat. Ka një kusht. Një kusht i cili ka qenë traditë duke filluar nga viti 1991 e deri më sot, që rregullat e lojës për reformën zgjedhore të bëhen nga të gjitha palët, palët që kanë peshë. Për këtë arsye, jo vetëm për këtë lloj kërkese të traditës, por si edhe një kusht i vendosur nga BE, 1 nga 15-tët, që na detyron edhe ne që të japim kontributin tonë”, shprehet Alibeaj.
Në vijim, ai shtoi se opozita gjithmonë ka pasur dyshimin që pala tjetër nuk do ta bëjë reformën zgjedhore, nuk do të kthehet e të bëjë një proces për shqiptarët, një proces ku njerëzit të votojnë lirshëm, të votojë atë kë duan, vota e tyre të numërohet dhe vota e tyre të mos manipulohet.
“Kjo duket është e qartë në këto momente. Kjo është arseja pse na ka shtyrë. A mund të bëjë një reformë të njëanshme? Do donte shumë Rama. Të jeni të sigurt, do donte shumë. Tërheqja nga pozicionet tregon këtë lloj synimi”, tha Alibeaj.
