Lojtarët e Bayern Munich kanë pranuar të ulin pagat e tyre deri në përfundimin e këtij sezoni për të ndihmuar skuadrën e tyre në vështirësitë financiare që ka shkaktuar pandemia e coronavirusit.
Lajmin e ka bërë publik sot presidenti i Bayern Munich, Herbert Hainer, i cili është shprehur i kënaqur nga bashkëpunimi që kanë treguar të gjithë lojtarët.
“Është kënaqësi të shohësh që skuadra jonë e kupton situatën dhe do të heqin dorë përsëri nga një pjesë e rrogës së tyre deri në fundin e sezonit.” – ka thënë Hainer për “Bild”.
Bayern kryeson kampionatin me shtatë pikë avantazh ndaj Borussias së Dortmundit të vendit të dytë, ndërsa kanë mbetur vetëm gjashtë ndeshje deri në përfundimin e sezonit.
Skuadra e drejtuar nga Hansi Flick, gjithashtu është në rrugën e mbarë në Ligën e Kampioneve, pasi ndeshjen e parë ndaj Chelsea-t në fazën e 1/16-ve e kanë fituar me rezultatin 3-0.
