Forcat “Shqiponjat” në bashkëpunim me Policinë e Tiranës kanë ekzekutuar operacionin e koduar “Fresku” duke vënë në pranga një 45-vjeçar, pasi akuzohet për armëmbajtje pa leje dhe prodhim të lëndëve narkotike.
Pas hekurave ka përfunduar shtetasi A. G., 45 vjeç, banues në Tiranë.
Arrestimi i tij u bë i mundur pas informacionit të marrë në rrugë operative se po qarkullonte në orët e pasdites në zonën e Freskut, duke mbajtur me vete armë zjarri dhe lëndë narkotike.
“Gjatë operacionit, nga kontrolli fizik në çantën e dorës, këtij shtetasi iu gjet një armë zjarri pistoletë dhe një sasi e vogël lëndë narkotike e dyshuar kokainë. Ndërsa gjatë kontrollit në banesë këtij shtetasi iu gjet një tjetër armë zjarri pistoletë me fishekë në fole gati për qitje, një armë gjahu shotgun dhe një sasi fishekësh luftarak.” njofton policia.
Materialet i referohen Prokurorisë së Rrethit Gjyqësor Tiranë, për hetime të mëtejshme, për veprën penale “Prodhimi dhe shitja e narkotikëve” dhe “Armëmbajtja pa leje”, për të cilën parashikohet dënimi me burgim deri në 7 vjet.
