Po luan sezonin e tretë me Kukësin dhe tani e ndien veten të aftë për t’u bërë pjesë e një lige më të fortë europiane. Valon Et’hemi, vetëm 22 vjeç, është shndërruar pikë e fortë në skuadrën verilindore, e cila mund ta bindë të qëndrojë vetëm nëse i ofron një kontratë bindëse.
Në një intervistë për Supersport, mesfushori 22-vjeçari u shpreh:
“Na kishte munguar shumë stërvitja me grupin dhe ndeshjet e më në fund u rikthyem e po ndihemi shumë mirë. Jemi stërvitur me sa kushte kemi pasur nëpër shtëpi.”
Transferimi te Partizani? Jam pjesë e Kukësit, por më bëhet qejfi që tifozët më duan në ekipet e tyre. Do të bëj maksimumin e pastaj të shohim se çfarë do të ndodhë në të ardhmen. Çdo futbollist dëshiron të luajë në një ligë më të fortë në Europë. Mendoj se e ndiej veten gati për të bërë këtë kalim.
Kontrata me Kukësin drejt fundit: Kam firmosur kontratë 3-vjeçare, e cila përfundon në fund të sezonit. Ka sinjale që klubi dëshiron të rinovojë, pres një ofertë të kënaqshme. Do të marr vendimin më të mirë për të ardhmen time./ Supersport
