Kristjan Breshanaj, 25 vjeç, u ekyekutua me 5 plumba kallashnikovi, në orët e para të ditës së djeshme, shumë pranë banesës së tij.
Pak orë pas vrasjes misterioze policia arriti të gjente të djegur një automjet tip BMW me targa greke, i cili ishte shkrumbuar, ndërsa brenda tij gjendej edhe një armë automatike, që dyshohet se është përdorur për krimin.
I riu që u ekzekutua kishte vetëm 3 muaj që kishte ardhur nga Belgjika dhe kjo duket se përbën edhe pistën e parë të hetimit të policisë, për të parë nëse viktima ishte përfshirë ose jo në aktivitete kriminale në vendin europian.
Burime policore bëjnë me dije se gjithashtu po hetohet mbi konflikte të mëparshme të viktimës, por edhe të shkuarën e tij, ku është raportuar se para disa vitesh është arrestuar për narkotikë.
Ditën e djeshme, i ndjeri është përcjellë për në banesën e fundit, ndërsa policia ka pyetur familjarë dhe të njohur apo miq të viktimës.
Pas krimit u shoqëruan rreth 14 persona, me cilësinë e personave që mund të kishin dijeni mbi ngjarjen, apo detaje që mund të çojnë në zbardhjen e krimit.
Sipas disa dëshmive të mbledhura nga policia, i riu nuk punonte, por nuk ishte as person problematik, të paktën sipas pohimeve të fqinjëve të viktimës.
