Një 25-vjeçar u gjet i vrarë me armë zjarri në Vlorë, ndërsa policia ka nisur hetimet.
Sipas njoftimit të policisë, shtetasi Kristiano Breshani është qëlluar me armë zjarri në lagjen “Uji i Ftohtë” pranë zonës së quajtur “7 pallatet”, në rrethana ende të paqarta.
Ngjarja ka ndodh në orët e para të së dielës, pak pas mesnate, në afërsi të banesës së viktimës. Dyshohet se autorët e kanë pritur në hyrje të banesës 25 vjeçarin ndaj të cilit kanë qëlluar me breshëri.
Në trupin e viktimës janë gjetur 5 plumba, ndërsa 1 orë pas krimit, rreth orës 02:00, policia ka gjetur një automjet tip BMW me targa greke, i cili ishte i djegur.
Dyshohet se automjeti është përdorur në krim. Brenda makinës është gjetur edhe një armë automatike, që po i nënshtrohet ekspertizës.
Në krimin ndaj 25-vjeçarit dyshohet se kanë marrë pjesë të paktën dy persona.
25 vjeçari ka ndërruar jetë në vend. Mësohet se 25 vjeçari kishte vetëm 3 muaj që ishte kthyer nga Belgjika, çka është dhe pista kryesore e hetimit.
Policia raportohet se ka shoqëruar 12 persona që mund të hedhin dritë mbi ngjarjen, ndërsa janë sekuestruar edhe disa kamera sigurie në zonë.
Viktima është djali i një mjeku të njohur në spitalin e qytetit të Vlorës, i cili mësohet se ka qenë në shërbim në momentin që djali i tij është ekzekutuar.
Ja njoftimi i plotë i policisë:
Në lagjen “Uji i Ftohtë”, pranë zonës së quajtur “7 pallatet”, në rrethana ende të paqarta është vrarë në rrugë dyshohet me armë zjarri shtetasi K. B., 25 vjeç.
Forca të shumta të policisë kanë shkuar menjëherë në vendngjarje, janë ngritën pika kontrolli dhe vijon krehja e zonës për kapjen e autorit/ëve.
Gjatë krehjes së zonës, në një nga rrugicat e lagjes “10 Korriku” Vlorë, shërbimet e Policisë kanë konstatuar në flakë një automjet, brenda të cilit është gjetur një armë zjarri automatik kallashnikov, e cila dyshohet të jetë arma e krimit.
Policia e Vlorës ka nisur të shoqërojë persona që mund të kenë dijeni për rrethanat e krimit.
Grupi hetimor nën drejtimin e Prokurorisë vijon punën për grumbullimin e çdo prove të vlefshme me qëllim zbardhjen e rrethanave të ngjarjes, identifikimin dhe kapjen e autorit/ëve.
