Inxhinier Malti Grabovaj një prej personave të dhunuar gjatë protestës për Teatrin një javë më parë, ka treguar në Abc News mbi pasojat që i ka shkaktuar përplasja me policinë.
Ai tha se pas një vizite mjekësore ka rezultuar me çarje të daulles së veshit, dhe pas disa muajsh trajtim mjekësor mund t’i duhet një ndërhyrje kirurgjikale.
Grabovaj deklaroi se do ta ndjekë penalisht çështjen edhe pse personin që e ka goditur e ka cilësuar si hasëm. Megjithatë ai theksoi se ndjesitë e bukura që ka marrë nga kjo festë ia kanë hequr urrejtjen dhe ka vendosur t’ia lënë në dorë ligjit pas daljes së raportit mjeko-ligjor.
“Kur po prishej eksperimentali, turma afrohet te kordoni i policisë, Ato mobilizohen dhe unë u gjeta i rrethuar nga turma. Unë gjendem aty dhe u hap kordoni i forcave të Rendit. Pas tyre rrinin forcat shqiponja. Unë jam goditur me shqelma, grushte dhe shpulla, katër ose pesë efektivë për të më neutralizuar. Jam goditur në mënyrë brutale. Një prej efektivëve më shante rëndë nga familja dhe më thoshte “je kundra Teatrit ti?!”
Dhe vetëm më ndërhyrjen e kolegëve më la. Më pas jam prangosur. Pas kordonit të policisë jam rrëzuar aty, më pas në makinën e policisë më kanë dhunuar psikologjikisht. Nuk ka pasur dhunë fizike. Më bënte përshtypje reagimi i policëve që më pyesnin çfarë do atje, më thoni çfarë të duhet ty të dalësh aty, ti ke një profesion të mirë. Jam shoqëruar në rajonin numër 1 dhe më kanë mbajtur aty për 9 orë. Unë kam qenë vetëm në shesh dhe i pashoqëruar me askënd. Mbaj mend kur isha aty shikoja një person në distancë që merrte më shumë goditje. Jam njohur me të në komisariat
Mjeku më ka thënë se kam një çarje të daulles së veshit, ulje të dëgjimit në veshin e djathtë. Kam kontaktuar me një avokat dhe do bëj një procedim penal për Policinë e Shtetit dhe do kërkoj një dëmshpërblim. Mjekët më kanë thënë se mund të kem nevojë për një ndërhyrje pas dy muajsh. Nëse veshi im reagon keq mund të shkoj deri në humbje të shqisës. Duhet të kem shumë kujdes nga zhurma, kur bëj dush dhe nevojat e mia personale. Jam me antibiotikë. Pres raportin mjeko-ligjor për t’ia paraqitur avokatit të Popullit.
Kam fjetur këto 7 ditë me inatin për ta gjetur këtë person dhe unë e konsideroj hasmin tim. Por ndjesitë e bukura që kam marrë nga kjo festë unë e them se e kam falur personalisht, por jo ligjërisht”, tha ai.
