Kryeministri Edi Rama gënjeu sërish këtë të Diel, teksa foli për hapjen e plazheve në vend.
Përmes një komunikimi nga faqja e tij në FB, shefi i ekzekutivit deklaroi se “plazhet hapen nga 1 qershori për hotelet dhe pas 10 qershorit për të gjithë”.
Për të mbështetur vendimmarrjen, u shpreh po ashtu se: “Askush sot në Europë si ka hapur plazhet”. “Nuk ka asnjë vend që i ka hapur plazhet”, tha Rama. (Min 8:30)
Një deklaratë e gënjeshtërt kjo e kreut të qeverisë. Fqinji jugor rezulton ti ketë hapur plazhet rreth një javë më parë. “Grekët vërshuan në bregdet të Shtunën kur më shumë se 500 plazhe u rihapën”, raportoi “Reuters” më 16 Maj.
Vende të tjera në Europë po ashtu i hapin plazhet të Hënën. Dhe janë pikërisht dy nga shtetet më të prekura nga pandemia e COVID 19, Spanja dhe Italia. Italia madje të Hënën hap edhe pishinat e palestrat.
“Palestrat, pishinat dhe qendra sportive, në pjesën më të madhe të Italisë do të rihapen të hënën më 25 maj”, raportoi agjencia publike e lajmeve italiane ANSA, këtë të Diel.
Mbetet e paqartë ndërkohë, vendimmarrja e kreut të qeverisë për shtyrjen e hapjes së plazheve dhe bizneseve të tjera, teksa dy nga vendet më të prekura në Europë nga COVID zhvillojnë një qasje të kundërt. Për më shumë që kreu i qeverisë, si dhe autoritet shëndetësore në vend, kanë deklaruar se situata është nën kontroll për sa i përket pandemisë.
Kjo e sotmja nuk është gënjeshtra e parë e Ramës në kohë pandemie. Më flagrantja është cilësuar ajo e videos së dhunës policore në Algjeri, që Rama i paraqiti si imazhe të filmuara në Spanjë.
