Kryetari i Partisë Demokratike, Lulzim Basha deklaroi pas takimit me ekspertë të PD për reformën zgjedhore se “opozita po e bën detyrën e saj në raport me 15 kushtet për integrimin”.
I pyetur nga gazetarët për propozimin me 14 pika të prezantuar këtë të Premte nga Presidenti Ilir Meta me qëllim sipas kreut të shtetit, përshpejtimin e integrimit në BE, Basha tha se e ka marrë propozimin, por nuk deklaroi se pranon të ulet në një tryezë me kryeministrin Edi Rama.
“Jam njohur me propozimin e Presidentit, që në javën e parë të Prillit. E ka marrë përgjigjen time. I kam thënë që Edi Rama ka 15 detyra për të kryer, opozita ka një”, tha Basha duke iu referuar reformës zgjedhore për të cilën tha se opozita do vijojnë të mbetet e angazhuar.
“Në këtë detyrë Edi Rama s’po tregon vullnet. Ne absolutisht do tregojmë vullnet për ta realizuar. 14 detyrat e tjera kanë të bëjnë me Edi Ramën, kanë të bëjnë me arrestimin e njerëzve që mban në krahun e tij të djathtë, të dosjeve 339 e 184, është një nga kushtet e BE. Kanë të bëjnë me vënien e drejtësisë për zgjedhjet e vjedhura, ka të bëjë me reformën zgjedhore, me luftën kundër korrupsionit. Në asnjë nga këto detyra, opozita nuk është e pranishme. Detyra e opozitës është 1 dhe vetëm 1. Dhe në tryezën e reformës zgjedhore jemi për një arsye. Për të larguar një orë e më parë Edi Ramën që është e keqja e venit, e Shqipërisë e të ardhmen europiane”, deklaroi.
https://www.facebook.com/lulzimbasha.al/videos/547093792645590/
“Opozita po e bën detyrën e saj në raport me 15 kushtet për integrimin. 15 kushtet për integrimin janë për ne udhërrëfyesi për ta nxjerrë vendin nga kriza, për ta çuar drejt zgjedhjeve me standarde me garanci. Kjo është detyra e opozitës. Opozita s’mund të behet fasadë për të tepër e një njeriu që ka treguar se s’ka vullnet as për reformën zgjedhore, dhe që siç treguan ngjarjet e dy javëve të fundit është përpjekur të sabotojë dhe të hedhë në erë procesin e reformës zgjedhore, të mbajë peng procesin e integrimit europian, për interesat vetjake”, shtoi ai.
I pyetur për deklaratat e ambasadores amerikane për lojëra me refmën në drejtësi e atë zgjedhore, Basha tha ai që po luan është Edi Rama.
I pyetur në lidhje me sistemin danez të zgjedhjeve, që u raportua se u propozua nga SHBA, Basha ka mohuar të ketë një propozim të tillë.
“Nuk ka një propozim të tillë amerikan. Ka një vullnet timin personal për tu dhënë shqiptarëve sistemin që meritojnë. Nuk shoh asnjë vullnet nga Edi Rama për ta ndryshuar sistemin. Jam i hapur për listat dhe çdo lloj reforme të re. Gjëja e parë është të shporrim me votë masive”, tha Basha.
