Tirana është pranë fitimit të titullit numër 28 kampion në Kategorinë Superiore, trofe i cili mungon që nga sezoni i largët 2008-2009. Bardheblutë aktualisht e kryesojnë kampionatin me 9-të pikë avantazh nga vendi i dytë që mbahet nga Kukësi, ndërsa kanë mbetur edhe 10-të ndeshje deri në përfundimin e sezonit.
Gjithsesi edhe pse në situatë të favorshme asgjë nuk ka mbaruar dhe mbetet akoma shumë për tu luajtur. Ndërkohë te Tirana po mendohet edhe për të ardhmen ku në fakt shumë gjëra janë në pikëpyetje. Brenda ekipit ka tetë lojtarë mbi 30-vjeç, ndërsa 13 të tjerë në përfundim të sezonit janë pa kontratë.
Probleme këto jo të vogla për një klub që kërkon të vendosë hegjemoninë e dikurshme dhe që me siguri vitin e ardhshëm do të jetë skuadra që do të mbrojë titullin. Kështu burime pranë klubit bëjnë me dije se disa nga lojtarët e këtij sezoni do të largohen. Akoma nuk ka një listë përfundimtare, por pas titullit, gjasat janë që presidenti Refik Halili të ulet së bashku me trajnerin Emanuel Egbo dhe të diskutojnë për skuadrën e re.
Do të jetë trajneri dhe stafi teknik që do të piketojnë lojtarët për sezonin e ri si në dalje dhe hyrje. Në skuadër janë disa senatorë që nuk kanë një kontratë për sezonin e ri. Duke filluar nga Tefik Osmani, Kristi Vangjeli, Erando Karabeci, Agustin Torasa, Uinful Kobina, Edon Hasani, Majkëll Ngo, Idriz Batha, e deri tek Erjon Hoxhallari e Albi Doka janë të gjithë në pikëpyetje për sezonin e ri.
Shumë nga këto futbollistë do të largohen, qoftë me miratimin e klubit ose vetë futbollistët nuk do të pranojnë firmosjen. Plani i Tiranës është që për sezonin 2020-2021 të mbajë disa nga titullarët e e këtij sezoni ndërsa pjesa tjetër e ekipit është në pikëpyetje për sezonin e ri.
