Pasditen e kësaj të Mërkure, rikthehet protesta kundër shembjes së Teatrit Kombëtar. Protesta, e thirrur nga Aleanca për Mbrojtjen e Teatrit, është planifikuar të zhvillohet që prej orës 17:30 pranë vendit ku ngrihej godina e TK, e shembur me vendim të Bashkisë së Tiranës, të drejtuar nga Erion Veliaj dhe miratimin e kryeministrit Edi Rama.
Ditën e djeshme, nuk u zhvillua protestë, pasi siç njoftuan artistët të Hënën, përkoi me Natën e Kadrit.
Në protestën e dy ditëve më parë, artistët bënë thirrje për largimin e Edi Ramës nga drejtimi i qeverisë dhe Erion Veliajt nga posti i kryetarit të bashkisë së Tiranës.
Shembja e Teatrit Kombëtar u cilësuar një krim dhe u kërkua hetim për çështjen.
Artistët paralajmëruan se do të zhvillojnë protesta të vazhdueshme deri në largimin e qeverisë dhe do pengojnë punimet për ndërtimin e teatrit të ri nga bashkia.